նախընտրելի դարձնելՀայաստանի իշխանությունները ծրագրում են նոր Սահմանադրության նախագիծը հրապարակել արդեն նոյեմբերին։ Այս մասին նոյեմբերի 2-ին Ազգային ժողովի մշտական հանձնաժողովների համատեղ նիստում՝ 2027 թվականի պետական բյուջեի նախագծի քննարկման ժամանակ, հայտարարել է ՀՀ վարչապետ Նիկոլ Փաշինյանը։
«Մենք կհրապարակենք նոր Սահմանադրության նախագիծը, կմեկնարկեն հանրային քննարկումները, կներկայացվեն և կդիտարկվեն ստացված առաջարկները։ Այդ գործընթացը կշարունակվի այնքան ժամանակ, քանի դեռ չենք համոզվել, որ նոր Սահմանադրության նախագիծը բավականաչափ լայնորեն քննարկվել է մեր հանրության շրջանում», — վստահեցրել է Փաշինյանը։
Վարչապետը նշել է, որ Կառավարության առաջիկա կարևորագույն խնդիրներից մեկն Ադրբեջանի հետ խաղաղության պայմանագրի ստորագրումն ու վավերացումն է։ Այս համատեքստում ընդդիմությունը հարց է բարձրացնում, թե արդյոք նոր Սահմանադրության ընդունումը երաշխավորում է համաձայնագրի ստորագրումն ու համապարփակ խաղաղության հաստատումը։
«Մոտ ապագայում մեր ջանքերն ուղղված են լինելու հենց այդ հարցերի պատասխանները ստանալուն։ Եթե Հայաստանի իշխող մեծամասնությունն այդ հարցին տա հստակ դրական պատասխան և համոզիչ կերպով պատասխանի նաև դրանից բխող հարցերին, ապա թույլ տվեք իմ համոզմունքն արտահայտել. եթե նման դրական պատասխանների առկայության պայմաններում մենք սկսենք նոր Սահմանադրության ընդունման գործընթացը, Հայաստանի Հանրապետության քաղաքացիների ճնշող մեծամասնությունը կգնա ընտրատեղամասեր և «կողմ» կքվեարկեն դրան։ Եթե մենք ստանանք դրական պատասխաններ, իսկ խորհրդարանական ընդդիմությունը դեմ արտահայտվի, դա կնշանակի, որ ընդդիմությունը դեմ է Ադրբեջանի հետ խաղաղությանը։ Այդ դեպքում ընդդիմության նկատմամբ, անկասկած, կսկսի հանրային ճնշում ձևավորվել։ Եվ ես կարծում եմ, որ Հայաստանի իշխող մեծամասնությունը պետք է առաջնորդի այդ ճնշումը», — նշել է կառավարության ղեկավարը։
Հիշեցնենք, որ 2025 թվականի օգոստոսի 8-ին Հայաստանն ու Ադրբեջանը նախաստորագրել են խաղաղության համաձայնագիրը։ Պաշտոնական Բաքուն որպես դրա ստորագրման նախապայման առաջադրել է Հայաստանի Սահմանադրության փոփոխության պահանջը՝ պնդելով, իբր այն տարածքային պահանջներ է պարունակում Ադրբեջանի նկատմամբ։ Բաքուն այս պնդումն առաջ է քաշում՝ հղում անելով ՀՀ Սահմանադրության նախաբանում Հայաստանի Անկախության հռչակագրի հիշատակմանը։ Հայկական կողմն իր հերթին բազմիցս հայտարարել է, որ ՀՀ Սահմանադրությունը տարածքային պահանջներ չի պարունակում որևէ երկրի, այդ թվում՝ Ադրբեջանի նկատմամբ։
