նախընտրելի դարձնելՔողարկելով քաղաքական դրդապատճառները՝ իշխանությունները կաթվածահար են անում մեր կուսակցության աշխատանքը՝ գիտակցելով, որ այստեղ է տեղակայված դրա գրասենյակը։ Այս մասին նոյեմբերի 4-ին լրագրողների հետ զրույցում հայտարարել է «Ուժեղ Հայաստան» կուսակցության անդամ Գոհար Մելոյանը։
«Այսօր մենք պետք է ներկայացնեինք հանձնաժողովների 635 անդամների՝ նոյեմբերի 29-ին մարզերում կայանալիք ընտրությունների համար, սակայն այսօր մենք նման հնարավորություն չունենք, քանի որ խուզարկություններ են իրականացվում։ Առավոտվանից կուսակցության գրասենյակներում քննչական գործողություններ են ընթանում, որոնց շրջանակում շրջանառվել են մեր քաղաքական գործունեության հետ որևէ կապ չունեցող ընկերությունների անվանումներ»,- նշել է Մելոյանը։
Նրա խոսքով՝ գրասենյակում փնտրել են փաստաթղթեր, համակարգիչներ և այլ իրեր։ «Հասկանալի է՝ եթե այս շենքում էր տեղակայված նախընտրական շտաբը, ապա այն առանց այդ էլ վաղուց գտնվում էր խիստ վերահսկողության ներքո։ Ակնհայտ է, որ խուզարկությունների արդյունքում որևէ նոր բան չի հայտնաբերվելու։ Վարչապետը խորհրդարանում հայտարարել էր, թե իրենք կհամոզեն ընդդիմությանը կողմ քվեարկել Սահմանադրությանը։ Դրանից հետո հնչեցին այլ պաշտոնյաների հայտարարությունները, և այժմ իշխանությունները փորձում են ճնշում գործադրել։ Այսօրվա բեմականացումը բացառապես կապված է ալիևյան Սահմանադրության օրակարգի հետ»,- ընդգծել է Մելոյանը։
Մելոյանը պնդել է, որ Փաշինյանն Ալիևից վերջնաժամկետ է ստացել իր բնորոշմամբ՝ «խայտառակ օրակարգն» արագ իրագործելու համար։ Նրա կարծիքով՝ իշխանությունները ճնշում են գործադրում այն ուժերի նկատմամբ, որոնք մտադիր են պաշտպանել հայկական ինքնությունը։ «Եթե իշխանությունները վստահ լինեին իրենց ուժերին, վաղուց հանրաքվե կանցկացնեին, սակայն ժողովուրդը չի կիսում ալիևյան Սահմանադրության օրակարգը»,- հավելել է նա։
Մելոյանը համոզմունք է հայտնել, որ եթե իրավիճակը չփոխվի, Ալիևի պահանջներն ու Փաշինյանի զիջումները կշարունակվեն։ Նրա գնահատմամբ՝ նույնիսկ հայկական կողմի այսքան զիջումներից հետո խաղաղության պայմանագրի ստորագրման երաշխիքներ չեն ստացվել։
«Այնուհետև Ալիևը, հաշվի առնելով այսպես կոչված «Արևմտյան Ադրբեջանի» օրակարգը, աշխարհից կպահանջի չճանաչել Հայաստանը որպես պետական միավոր, քանի որ Փաշինյանը զիջում է մեր պետության հիմքերը»,- եզրափակել է Մելոյանը։
