նախընտրելի դարձնելՊահեստազորի գնդապետ, Վոլոդյա Ավետիսյանի գործով դատավոր Լեւոն Ավետիսյանին պետք է հեռացնեն աշխատանքից, քանի որ դատական նիստերին նա լկտի վերաբերմունք է ցույց տալիս ազատամարտիկների հանդեպ: Այս մասին այսօր՝ հունիս 26-ին, NEWS.am-ի հետ զրույցում ասացին «Ի պաշտպանություն Վոլոդյա Ավետիսյանի» նախաձեռնության անդամները, որոնք այսօր նման պահանջով նամակներ են ուղարկել Արդարադատության նախարարին եւ Սերժ Սարգսյանին:
«Ազատամարտիկների հանդեպ շատ լկտի պահելաձեւ ունի, նա ամեն կերպ աշխատում ա այնպես անել, որ մեզ համբերությունից հանի, որ մենք ինչ-որ անշնորքություն անենք, եւ դրանով ինքը կոզրներ հավաքի: Մենք ուզում ենք, որպեսզի իրենց ընդհանրապես հեռացնեն աշխատանքից, քանի որ նա օրենսդրության բոլոր կետերը խախտելով, աշխատում ա Վոլոդյա Ավետիսյանին պարզապես բանտում պահի»,- ասաց Արտաշես Ահարոնյանը:
Ահարոնյանը պատմեց, որ Վոլոդյա Ավետիսյանի գործով նախորդ դատական նիստին դատավոր Ավետիսյանը վիրավորել է ազատամարտիկներին:
«Մեղադրողը նախորդ դատական նիստին շատ անպատրաստ էր, անընդհատ կմկմում էր, հեռախոսի ինչ-որ խոսակցություններ էր կարդում, բայց Վոլոդյան նման արտահայտություններ չունի, որ մեկ էլ հեռախոսով նման բաներ ասեր: Ու էնքան կմկմաց, որ տղաներից մեկը՝ Յուրա Աթոյանը, քմծիծաղ տվեց, դատավորը միանգամից պահը օգտագործեց, ասեց՝ էդ ով էր, ու առանց պատասխանի սպասելու ասեց՝ հերիք ա կնոջ փեշի տակ պախկվեք: Մարդը, որը իրա կյանքի ընթացքում դատավորի մազերի չափ թուրք ա սպանել, երբեք կնոջ փեշի տակ չի պախկվի: Էդ դատավորը ինքն ա սկզբից իրա կնոջ փեշի տակ թաքնվել, հիմա էլ Սերժի փեշի տակ ա պախկվում տականքը»,- ասաց Արտաշես Ահարոնյանը:
Ազատամարտիկների կարծիքով, դատավորի այդ խոսքերը վիրավորանք էր՝ ուղղված բոլոր ազատամարտիկներին.
«Ինքը ազգի դավաճան ա, իրան պետք ա գնդակահարել, անկեղծ ասած, դրա համար մենք իրան գործից ազատելու պահանջով նամակներ ենք տարել Արդարադատության նախարարություն, Բաղրամյան 26»:
Հիշեցնենք, որ Վոլոդյա Ավետիսյանը մեղադրվում է խարդախության համար։ Ըստ նրան առաջադրված մեղադրանքի՝ նա 2000 դոլար կաշառք է վերցրել Հենրի Զաքարյանից՝ նրա թոռանը ժամկետային ծառայությունից ազատելու համար, եւ 500 դոլար է պահանջել Ալբերտ Մաթոսյանից նրա որդուն զորամասում համակարգչային օպերատոր նշանակելու հարցը լուծելու համար։ Վոլոդյա Ավետիսյանը հերքում է մեղադրանքը։ Նա եւ իր մարտական ընկերները կարծում են, որ սա քաղաքական հետապնդում է պահեստազորի գնդապետի դեմ՝ իրենց սոցիալական պայմանները բարելավելու նպատակով ազատամարտիկների բողոքի շարժումը ղեկավարելու համար:
