Մեր քաղաքական թիմը, ինչպես հեղափոխության ժամանակ, այնպես էլ դրանից հետո, հստակ հայտարարել է, որ Հայաստանի արտաքին քաղաքականությունում կտրուկ փոփոխություններ չեն լինի, եւ մենք կշարունակենք մնալ ինչպես  ԵԱՏՄ-ում, այնպես էլ՝ ՀԱՊԿ-ում: Այս մասին հունվարի 15-ին Հայաստանի Ազգային ժողովում հայտարարել է Արտաքին կապերի հարցերով մշտական ​​խորհրդարանական հանձնաժողովի նախագահի թեկնածու Ռուբեն Ռուբինյանը: Ըստ նրա, Հայաստանը պետք է հետեւի այդ ընթացքին: «ԵՏՄ-ից Հայաստանի դուրս գալու մասին խոսք անգամ լինել չի կարող: Ես կարծում եմ, որ սա մի հարթակ է, որը մենք կարող ենք եւ պետք է առավել արդյունավետ դարձնենք, որպեսզի օգուտներ քաղենք հենց Հայաստանի համար», - պարզաբանել է Ռուբինյանը: Միեւնույն ժամանակ, նա նշել է, որ կքննարկվի համապատասխան հանձնաժողովում գործող վերլուծական խորհրդի պահպանման հարցը՝ հավելելով, սակայն, որ մասնագետների հետ աշխատելու անհրաժեշտությունը չափազանց կարեւոր է: Անդրադառնալով Լեռնային Ղարաբաղի խնդրին՝ Ռուբինյանը շեշտել է, որ համապատասխան հանձնաժողովը, հնարավորության սահմաններում, պետք է աջակցի ՀՀ արտաքին գործերի նախարարությանը, ինչպես նաեւ Հայաստանի կառավարությանը` հայկական կողմի օգտին տվյալ խնդրի լուծման մեջ: