նախընտրելի դարձնելՊարոն նախարար, ՀՀ–ի համար անչափ ծանր, բարդ հոգեբանական քաղաքական ճգնաժամի ժամանակ ստանձնել եք Կրթության, գիտության, մշակույթի եւ սպորտի նախարարի պաշտոնը եւ ես կարծում էի, որ այստեղ Ձեր ելույթը պետք է սկսեիք հայեցակարգային գնահատական տալով առնվազն մի քանի տարիներին, եւ մասնավորապես՝ վերջին երկու տարիներին, որոնց ընթացքում բարձրագույն կրթության ոլորտում խութեր են թողնվել։ Այս մասին այսօր՝ փետրվարի 10–ին, Ազգային ժողովի նիստերի դահլիճից հայտարարեց անկախ պատգամավոր Գոռ Գեւորգյանը՝ դիմելով ԿԳՄՍ նախարար Վահրամ Դումանյանին։
Պատգամավորը որոշ դիտարկումներ արեց, ապա նշեց, որ ՀՀ–ում գիտության գեներացիան կատարվում է Գիտությունների ազգային ակադեմիայում։ Գոռ Գեւորգյանի այս հայտարարությանը տեղից արձագանքեց նախարարը, կարծես թե չհամաձայնելով նրա հետ, ապա նախարարի եւ պատգամավորի միջեւ երկխոսություն սկսվեց։
«Կներեք, ես հիմա Ձեզ հետ բանավեճի մեջ չեմ մտնում, բայց սիրով Ձեզ հետ կխորհրդակցեմ, ասում եմ այն՝ ինչ տեսել եմ, գիտեմ, քանի որ ինքս էլ հանդիսանում եմ Գիտությունների...., պարոն նախարար ես օդի մեջ բան չեմ ասում, եկեք իրար հարգենք, ու այդպիսի բաներ մեկս մյուսին չասենք, պարոն նախարար, ես կարող եմ Ձեզ չնայել, բայց խոսքս Ձեզ ուղղել, որովհետեւ Դուք եք ներկայացնում։ Քիչ առաջ խոսում էի ինտելեկտուալ հարգանքի եւ ազնվության մասին, եկեք հարգալից լինենք, ես Ձեզ անձնական բան չեմ ուղղել, խոսում եմ համակարգային խնդիրներից։ Պարոն նախարար, այստեղ նստած մարդիկ կարող են փաստել, որ ես իմ ամբողջ գործունեության ընթացքում որեւէ մեկի անունը չեմ տվել որեւէ հարց բարձրաձայնելիս»,– ասաց Գոռ Գեւորգյանը։
Նա նախարարին կոչ արեց մաքսիմալ ուշադրություն դարձնել ԳԱԱ գիտական ինստիտուտներին, որովհետեւ մեծ գումարներ են անհրաժեշտ, առանց որի գիտությունը զարգանալ չի կարող։
«Այդ գումարների տեղը Դուք ինձնից լավ պետք է իմանաք, 70 –80 000 դրամով գիտաշխատողն այսօր պրոդուկտ է ստեղծում, որը տպվում է միջազգային հեղինակավոր ամսագրերում, բայց գիտնականը ՀՀ–ում իրացվելիություն չի գտնում, դրա համար էլ ինչպես օրեր առաջ Դուք էիք նշում՝լքում են երկիրը»,– հավելեց պատգամավորը։
