նախընտրելի դարձնելԴատախազը փորձում է ճնշում գործադրել դատարանի վրա: Այս մասին լրագրողների հետ զրույցում ասաց ՀՀ երկրորդ նախագահ Ռոբերտ Քոչարյանի փաստաբան Արամ Վարդեւանյանը՝ մեկնաբանելով դատախազ Պետրոս Պետրոսյանի կողմից հնչեցված մտադրությունը միջնորդություն ներկայացնել ամբաստանյալների նկատմամբ մասերն առանձին վարույթների բաժանելու մասին:
Հիշեցնենք, որ Պետրոսյանի «արդարացի զայրույթի» պատճառը 4-րդ անգամ անընդմեջ նիստի հետաձգումն էր՝ Յուրի Խաչատուրովի, Արմեն Գեւորգյանի առողջական խնդիրների, մեկ այլ դատական նիստին մասնակցած փաստաբան Էրիկ Ալեքսանյանի բացակայության եւ հոսպիտալացվել համարձակված Սեյրան Օհանյանի պատճառով:
Արամ Վարդեւանյանը նշեց, որ Քրեական դատավարության օրենսգիրքը դա թույլ է տալիս, սակայն չափազանց հազվադեպ է օգտագործվում: Օրինակ, այդպես էր եղել հանգուցյալ Մանվել Գրիգորյանի հետ. առողջական խնդիրները ստիպում էին նրան հաճախ բացակայել:
«Այս պարագայում նման հիմքեր չկան: Կարծում եմ ՝ դատախազը հայտարարությունն արեց հայտարարություն անելու եւ դատարանի վրա որոշակի ճնշում գործադրելու համար: Փոխարենը պետք էր պարզապես առողջություն մաղթել Սեյրան Օհանյանին: Մենք բոլորս մարդ ենք, բոլորիս հետ էլ կարող է ինչ-որ բան պատահել»,- ասաց Արամ Վարդեւանյանը:
