նախընտրելի դարձնելԵրեւանի կենդանաբանական այգու աշխատակիցները բողոքի ակցիա են անցկացնում այգու տնօրենի ժամանակավոր պաշտոնակատարի նշանակման դեմ:
Բողոքի պատճառն այն է, որ աշխատողներն Արեւիկ Մկրտչյանին կենդանաբանական այգու նախկին տնօրեն Ռուբեն Խաչատրյանի կամակատարն են համարում: Հիշեցնենք, որ Խաչատրյանը հեռացվել էր աշխատանքից նույն քաղաքապետարանի կողմից՝ աշխատանքի վատ կազմակերպման համար:
«Մենք նախկինների վերադարձը թույլ չենք տա»,- հայտարարում են բողոքի ակցիային հավաքված աշխատակիցները:
Մկրտչյանը դեռ չի հանդիպել աշխատակիցների հետ: Խաչատրյանի «աջ ձեռքի» նշանակումից վրդովված աշխատակիցները պահանջում են խորհրդի նիստ անցկացնել:
Աշխատակիցներն այգու ներկայիս տնօրեն Վլադիմիր Սիմոնյանից դժգոհություն չունեն:
«Եթե քաղաքապետարանն այդքան անհանգստացած է կենդանաբանական այգու իրավիճակով, ապա ավելի լավ է բարձրացնել աշխատավարձերը: Աշխատողներն ընդամենը 71 հազար են ստանում՝ ամբողջ օրը արեւի տակ»,- բողոքում են աշխատակիցները:
Ուրբաթ օրվանից տնօրենի գրասենյակի դուռը կնքված է, իսկ վարչական շենքի մուտքը՝ փակ:
Նշենք, որ բողոքի ակցիան չազդեց կենդանիների խնամքի ժամանակացույցի վրա. աշխատանքային օրվա սկզբին բոլոր աշխատակիցները վերադարձան իրենց պարտականություններին:
