ՆախընտրելիԼեռնային Ղարաբաղի դեմ Ադրբեջանի կողմից սանձազերծված 44-օրյա պատերազմի հետևանքով անհետ կորած է համարվում 195 մարդ։ Այս մասին մարտի 3-ին Ազգային ժողովի նիստում հայտարարել է ՀՀ արդարադատության նախարար Սրբուհի Գալյանը՝ պատասխանելով ընդդիմադիր «Հայաստան» խմբակցության պատգամավոր Գառնիկ Դանիելյանի հարցին։
«Պաշտոնական տվյալներով, մենք ունենք 195 անհետ կորած անձ, որոնցից 175-ը զինծառայողներ են, իսկ մնացածը՝ քաղաքացիական անձինք», - ասել է Գալյանը։
Ինչ վերաբերում է ճանաչված մարմիններին նախարարը հայտնել է, որ վերջին տվյալներով, 75-80 մարմինների նույնականացման արդյունքները չեն ընդունվել մահացածների ընտանիքների կողմից։
Նա հավելել է, որ կրկնակի փորձաքննություններ են անցկացվել մասնագիտացված փորձագիտական գիտելիքներ և ռեսուրսներ ունեցող անձանց կողմից։
«Մասնագետները հաստատում են, որ նույնականացումը ճիշտ է իրականացվել», - ընդգծել է արդարադատության նախարարության ղեկավարը։
