Նախընտրելի2023 թվականի սեպտեմբերին Ադրբեջանը ցեղասպանություն իրականացրեց Արցախի ժողովրդի նկատմամբ։ Այս մասին ապրիլի 2-ին «Եռաբլուրում»՝ Քառօրյա պատերազմի մեկնարկի 10-րդ տարելիցի օրը, լրագրողների հետ զրույցում հայտարարել է Լեռնային Ղարաբաղի խորհրդարանի նախագահ Աշոտ Դանիելյանը։
«Մենք կարողացանք այդ քառօրյա պատերազմի ժամանակ հաղթանակ կրել և այն ինչ-որ պլանավորված էր Ադրբեջանի կողմից՝ չիրականացավ։ Այսօր մեր պարտքն է հիշել բոլոր այն տղաներին, ովքեր հերոսական պայքար տվեցին այդ օրերի ընթացքում և այսօր մենք պետք է շարունակենք այն գործը, որը այդ տղաները կիսատ թողեցին»,-ասել է Դանիեյլանը։ Նրա խոսքով՝ Հայաստանի իշխանությունները անտեսում են ամսաթիվը, քանի որ փորձում են հիշողությունից ջնջել Արցախի հետ կապված բոլոր ամսաթվերը և հենց Արցախ անվանումը։ Նա Հայաստանի ղեկավարության հայտարարությունները անվանել է ստեր և մանիպուլյացիա։ «Այն ատելությունը, որը դրսևորվեց վարչապետի պաշտոնը զբաղեցնող անձի կողմից Արցախի լեգենդար հերոսի դստեր նկատմամբ... Հանրային աջակցությունը փաստում է, որ ոչինչ չի ավարտվել։ Ապրիլյան պատերազմի ժամանակ իմ կարծիքով, Արցախի պաշտպանության բանակը և Հայաստանի Հանրապետությունը այն ժամանակ իրենց ունեցած բոլոր գործիքակազմերը կիրառել են, որպեսզի օր առաջ կանգնեցնեն պատերազմը և այն ժամանակ՝ 2016 թվականին Ադրբեջանի խնդրանքով է պատերազմը կանգ առել։ Ես Արցախում եմ եղել։ Այն ինչ տեղի է ունեցել մենք բոլորս տեսել ենք, այն բոլոր ստերը և 44 օր ժողովրդին «խաբել», որ հաղթում ենք, բայց մենք տեսնում էինք, թ Արցախում ինչ է կատարվում և դա՝ մանրակրկիտ քննության առարկա է։ Ազգային ժողովը դեռևս չի հրապարակել այդ քննիչ հանձնաժողովի զեկույցը։ Թող մանրամասն ներկայացնեն մեր հասարակությանը, թե ովքեր են մեղավոր, ովքեր են պատասխանատու և ինչպես նշեցիք մինչև այդ դեզերտիրներ, փախածներ, ինչ-որ քրեական գործ կա՞ հարուցված։ Քանի՞ քրեական գործ կա այդ շրջանակներում։ Եթե հունիսի 7-ին հայ ժողովուրդը որոշում կայացնի և հեռացնի այս իշխանություններին, պետք է ստեղծվի նոր հանձնաժողով, որն օբյեկտիվորեն կներկայացնի տեղի ունեցածի պատճառները», - նշել է Դանիելյանը։
Այն հարցին, թե ում պետք է ընտրի ժողովուրդը, ԱԺ նախագահը նշել է, որ դրանք պետք է լինեն ազգային ուժերը։ «ՀՀ-ում կան ուժեր, որոնք պատրաստ են պաշտպանել Հայաստանի, այլ ոչ թե օտար ուժերի շահերը։ Մենք սատարում ենք այն ուժերին, որոնց համար Արցախի հարցը փակված չէ և չի կարող փակված լինել։ Դա չի կարող լինել մեկ մարդու որոշում։ Դա համահայկական հարց է, այն սկսվել է Երևանի Ազատության հրապարակում»,- հայտարարել է Արցախի ԱԺ նախագահը՝ հավելելով, որ հարցը բարձրաձայնվելու է բոլոր ատյաններում։ Նա նկատել է, որ Փաշինյանը մշտապես տարբեր պատճառներ է բերում և մատնանշում տարբեր մեղավորների՝ նախկիններին, Ռուսաստանի Դաշնությանը, դասալիքներին։ Մենք բոլորս քաջ գիտենք, թե ով է հանձնել Արցախը և ով է պատասխանատվություն կրում տեղի ունեցողի համար, հավելել է Դանիելյանը։
Այն հարցին, թե որքանով է մեղավոր նախագահ Սամվել Շահրամանյանը, խոսնակը նկատել է, որ նոյեմբերի 9-ի հայտարարությունից հետո իրավիճակը սահմանին փոխվել է՝ դրա պարագիծը 200 կմ-ից դառնալով ավելի քան 500 կմ, անվտանգության համակարգը ձախողվեց, այնուհետև՝ 9 ամիս շրջափակում, և ՀՀ իշխանությունները ոչինչ չարեցին, որպեսզի արցախցիները դուրս գան այդ ծանր իրավիճակից։ Հետո տեղի ունեցավ լայնամասշտաբ հարձակում Արցախի վրա, որտեղ 120 հազար բնակչությունից 25-30 հազարը երեխաներ էին, իսկ 5 հազարը՝ տարեցներ։ «Ի՞նչ կարող էին նրանք անել։ Փաշինյանն արդարացնում է ադրբեջանցիների կողմից իրականացված ցեղասպանությունը։ 2023 թվականի սեպտեմբերի իրադարձությունները ցեղասպանություն են հայ ժողովրդի նկատմամբ։ ՀՀ իշխանությունները թույլ տվեցին դա։ Միջազգային հանրությունը նույնպես մեծ բացթողումներ թույլ տվեց, բայց առաջին հերթին՝ ՀՀ իշխանությունները։ Եթե նրանք չեն խոսում ցեղասպանության մասին, ապա մենք ասում ենք, որ բոլորն էլ իրենց մեղքի բաժինն ունեն Արցախի հայաթափման և ցեղասպանության հարցում»,- եզրափակել է Դանիելյանը։
