Ալիևը, կարծում եմ, հասկանում է, որ եթե շարունակի իր անվերահսկելի ուժային քաղաքականությունը, վաղը Ադրբեջանն ինքը կարող է դառնալ մեծ էքսպանսիայի զոհ և մեկընդմիշտ կորցնել ձեռք բերածը։ NEWS.am-ի «ՈւԺԻ ԳՈՐԾՈՆ» հաղորդման եթերում նման տեսակետ է հայտնել ՀՀ նախկին արտգործնախարար Արա Այվազյանը։
Նա ասաց, որ 44-օրյա պատերազմից հետո, երբ ինքը ղեկավարում էր ԱԳՆ-ն, Հայաստանն Իրանի հետ հարաբերությունները ռազմավարական գործընկերության մակարդակի բարձրացնելու քաղաքականություն էր սկսվել, և կարևոր պայմանավորվածություններ էին ձեռք բերվել։
«Բայց հետո, երբ հայտարարվեց, որ ժողովրդավարությունը մեր առաջնահերթությունն է, սա որոշ չափով ազդանշան դարձավ Իրանին, Ռուսաստանին և մյուս գործընկերներին, թե ով է մեր գործընկերը։ Հետեւաբար, Իրանի հետ երկխոսությունը չի կարող բովանդակային լինել, եւ այս հնարավորությունների պատուհանը գնալով նեղանում է։ Դրա նշանն է Իրանի և Ադրբեջանի հարաբերությունների սերտացումը։
Իրանին լուրջ դաշնակիցներ են պետք. Թեհրանի և Մոսկվայի միջև անվտանգության առանցք է ձևավորվում, և փաստաթուղթ է պատրաստվում ստորագրման ռազմավարական հարաբերությունների վերաբերյալ։ Հայաստանը կարող է կապող օղակ դառնալ նրանց միջեւ։ Եթե որևէ մեկը դժգոհություն է հայտնում Երևանի նման ծրագրերից, ապա կարելի է ասել, որ մենք ստիպված ենք բնական դաշնակիցներ փնտրել, քանի որ վտանգված է կենսունակ Հայաստանի գոյությունը»,- նշեց Այվազյանը։
Նրա խոսքով՝ 44-օրյա պատերազմը ցույց տվեց, որ Հայաստանը տնտեսական հանգույցի տեսանկյունից լուրջ նշանակություն չունի արտաքին խաղացողների համար, և երկիրը հայտնվել է արտաքին աշխարհից մեկուսացված վիճակում։
«Պատերազմից հետո մենք որոշեցինք ակտիվացնել աշխատանքը տնտեսական դիվանագիտության ոլորտում, այդ թվում՝ անվտանգության տեսանկյունից ամենակարեւոր նախագծի իրականացման ուղղությամբ, որն այժմ շատ դանդաղ է ընթանում։ Սա անընդունելի է։ Մենք պետք է արագացնենք այս աշխատանքը, որպեսզի մեծացնենք Հայաստանի նշանակությունը՝ որպես աշխարհաքաղաքական հանգույց։ Խոսքը Հյուսիս-Հարավ միջանցքի մասին է»,- եզրափակեց նախկին նախարարը։
