ԵՄ արտաքին քաղաքական գերատեսչության ղեկավար Ժոսեպ Բորելը հաստատել է, որ Իսպանիան, Իռլանդիան և Եվրամիության անդամ մյուս երկրները մտադիր են մայիսի 21-ին ճանաչել Պաղեստին պետությունը, դրա մասին հայտնել է Reuters-ը։
Բորելի մեկնաբանությունները հնչում են ՄԱԿ-ում Պաղեստինի լիիրավ անդամակցության հայտի վերաբերյալ ուրբաթ սպասվող քվեարկությունից առաջ:
Իսպանիայի վարչապետ Պեդրո Սանչեսը մարտին հայտարարել էր, որ Իսպանիան և Իռլանդիան, ինչպես նաև Սլովենիան և Մալթան պայմանավորվել են առաջին քայլերն անել Պաղեստին պետության ճանաչման ուղղությամբ՝ համարելով, որ «երկու պետությունների» սկզբունքով լուծումը էական նշանակություն ունի տևական խաղաղության համար։
Ի պատասխան իսպանական RNE ռադիոկայանի եթերում հնչած հարցին, թե մայիսի 21-ին Իսպանիան, Իռլանդիան և ԵՄ մյուս երկրները կճանաչե՞ն Պաղեստին պետությունը, Բորելը դրական է պատասխանել՝ հիշեցնելով նաև Սլովենիայի մասին։
«Սա քաղաքական բնույթի խորհրդանշական ակտ է։ Սա ավելին է, քան պետության ճանաչումը, սա պետության գոյության կամքի ճանաչումն է»,- շեշտել է ԵՄ բարձրագույն հանձնակատարը՝ հավելելով, որ Եվրամիության այս երկրներին, հավանաբար, կհետևեն Բելգիան և մյուսները:
Ավելի վաղ Իսպանիայի արտգործնախարար Խոսե Մանուել Ալբարեսը հայտարարել էր, որ ճանաչման մասին որոշումն արդեն ընդունվել է, թեև ժամկետ չի նշել։
Իսրայելը հայտարարել է, որ Պաղեստինը ճանաչելու ծրագրերը «ահաբեկչության համար պարգև» են, որը կնվազեցնի Գազայի հակամարտությունը բանակցային ճանապարհով լուծելու հնարավորությունները:
ՄԱԿ-ի Գլխավոր ասամբլեան ուրբաթ պետք է պաշտպանի Պաղեստինի լիիրավ անդամակցության հայտը՝ ճանաչելով նրան որպես անդամակցության իրավասու և դիմումն ուղարկելով ՄԱԿ-ի Անվտանգության խորհրդին՝ «հարցը դրականորեն քննարկելու համար»:
Իռլանդիայի ազգային RTE հեռուստաընկերությունը հինգշաբթի հայտնել է, որ Իսպանիան, Իռլանդիան, Սլովենիան և Մալթան սպասում են ՄԱԿ-ի քվեարկությանը և քննարկում են մայիսի 21-ին համատեղ ճանաչման հարցը: