Մենք իսկապես պայքարում ենք ճշմարտության ու հաղթանակի համար։ Այս մասին այսօր՝ մայիսի 9-ին, քայլերթի ընթացքում լրագրողների հետ զրույցում ասաց «Հայաքվե» նախաձեռնության համակարգող Ավետիք Չալաբյանը։
«Սա աթոռակռիվ չէ։ Սա իշխանության համար պայքար չէ, սա լինելիության համար պայքար է։ Մեր երկրում, ցավոք, տարիների ընթացքում տեսակ է առաջացել, որը մեր աչքի առաջ աճուրդի է հանել հայրենիքը՝ սեփական փորը լցնելու համար, որը պատրաստ է իր հայրենիկցների տները, կյանքը, հողը, երազանքները փողով վաճառել, միայն թե իր սեղանին ունենա լափ»,- նշեց Չալաբյանը։
Նրա խոսքով՝ երկիրը պետք է վերադարձնել բնականոն ընթացքին․ «Որում արժանիքը արժանիք է, արժանապատվությունը արժանապատվություն, պատիվը պատիվ, Արարատը Արարատ, Աստվածը Աստված։ Էն ամեն ինչը, ինչը մեր կյանքին իմաստ է տալիս։ էսօր դրա կռիվն է։ Մենք պետք է հաղթենք»։
Չալաբյանը ընդգծեց, որ երկրում այլևս պետք է չլինի ատելություն․ «Որովհետև արդեն 6 տարի այդ ատելությունը մեզ քամել է ու բերել կորուստների»։
Նշենք, որ այժմ «Հայաքվե» նախաձեռնության անդամները քայլերթով շարժվում են դեպի Երևանի մուտք՝ դիմավորելու Բագրատ Սրբազանի գլխավորած «Տավուշը հանուն հայրենիքի» շարժման անդամներին։