Վրաստանում մայիսի 8-ի գիշերը հարձակումներ են կատարվել առնվազն չորս ընդդիմադիր գործիչների եւ ակտիվիստների վրա, որոնք մասնակցում էին «օտարերկրյա գործակալների» մասին օրենքի ընդունման դեմ բողոքներին, տեղեկացրել է «Новости-Грузия»-ն։
Formula հեռուստաալիքը տեսախցիկներից վերցված կադրեր է ներկայացրել Սաակաշվիլու «Միասնական ազգային շարժում» կուսակցության ներկայացուցիչ Դմիտրի Չիկովանիի տան մոտից։ Նրան հետեւել եւ տան մոտ ծեծել է 5 հոգուց բաղկացած խումբը։
Հարձակումների են ենթարկվել նաեւ բայկեր Լաշա Գվինիանիձեն՝ «Գիրչի-ավելի շատ ազատություն» կուսակցության առաջնորդի եղբայր, պրոֆեսոր Գիա Ջափարիձեն եւ Transparency International-ի վրացական մասնաճյուղի գործադիր տնօրենի տեղակալ Գիորգի Օնիանին։
Անհայտ անձինք հարձակվել են նրանց վրա քաղաքի տարբեր մասերում։ Բոլորը հարձակումից հետո բուժօգնության կարիք են ունեցել։
Վրաստանի ՆԳՆ-ն իրավիճակի հետ կապված մեկնաբանություններ չի տվել։
Տեղեկացվել է նաեւ, որ երեքշաբթի օրվանից օրենքի դեմ բողոքների մասնակից ակտիվիստները զանգահարել են անհայտ համարներից եւ սպառնացել հաշվեհարդարով, հայտնի է նման տասնյակ դեպքերի մասին։ Որոշ դեպքերում վախեցնելու համար զանգահարել են ազգականներին։
Վրաստանի Տարածաշրջանային հեռարձակողների դաշինքի տնօրեն Նատիա Կուպրավշվիլին պատմել է, որ մի քանի զանգեր է ստացել, որոնցով սպառնացել են հարձակվել նրա վրա իր տան մոտ։ Առաջին զանգն իբր կատարվել է ուկրաինական համարից, մյուսները՝ իբր գերմանական։
«Գիրչի» կուսակցության անդամ Բորիս Չելե Կուրուան ասում է, որ զանգի ժամանակ իրեն հայտնել են իր հասցեն եւ սպառնացել, որ կսպանեն։ Նման սպառնալիքներ ստացել է «Գիրչիի» մեկ այլ անդամ՝ Նիկի Մոսիաշվիլին։
Pirveli ընդդիմադիր հեռուստաալիքը հավաստիացնում է, որ զանգերի շարքը կազմակերպվել է քոլ-կենտրոնների միջոցով, որոնք վերահսկում են իշխանությունները։
Կառավարող «Վրացական երազանք» կուսակցության ներկայացուցիչները հավաստիացնում են, որ կապ չունեն այդ դեպքերի հետ։
Հիշեցնենք, որ վրացական հասարակական կազմակերպությունները շաբաթ օրը, մայիսի 11-ին, պատրաստում են բողոքի մեծ ակցիա «օտարերկրյա գործակալների» մասին օրենքի ընդունման դեմ, որը կարող է դառնալ ամենամեծերից մեկը բողոքների ընթացքում։
