Սահմանազատման գործընթացը կասեցնեն, չկասեցնեն, կամ ինչպես անեն, դրա համար կան համապատասխան կառույցներ եւ այդ ուղղությամբ որոշումներ ընդունելու համար նախ պետք է ունենալ դրա իրավասությունը, երկրորդը ունենալ բավարար տեղեկատվություն տեղի ունեցողի վերաբերյալ: Այս մասին, այսօր՝ մայիսի 9-ին, «Հաղթանակ» զբոսայգում լրագրողների հետ զրույցում նշեց ԱԺ ՔՊ խմբակցության պատգամավոր Բաբկեն Թունյանը:
«Այո, կարող են իրենց տեսակետն արտահայտել, բայց արտաքին քաղաքականությունը որոշում է դիվանագիտական կառույցի եւ մնացած կառույցների կողմից, որոնք ամբողջ տեղեկատվությանը տիրապետում են:
Շարժումը սկսվեց Կիրանցից եւ հիմնական խնդիրը կապված են Կիրանցի եւ Ոսկեպարի հարող տարածքների հետ: Մենք այսօր տեսնում ենք, որ թե Կիրանից, թե Ոսկեպարի բնակիչները սահմանազատման գործընթացի փաստացի արդյունքներից այսօր դժգոհ չեն: Ավելին, ասում են՝ իրենց ակնկալիքներից ավելին են ստացել: Ես ուզում եմ հարց տալ՝ հիմա մենք հիշո՞ւմ ենք, թե ինչից է սկսվել այդ պայքարը եւ որքանով է ի սկզբանե հայտարարված նպատակը դեռեւս արդիական: Մարդիկ գնացել էին, որ աջակցեն տեղի բնակչության պահանջներին, բայց այդ մարդիկ այսօր որեւէ բողոք չունեն»,-ասաց նա:
Թունյանը նկատեց, որ սահմանազատման գործընթացն արվում է առաջին հերթին ՀՀ անվտանգությունն ամրապնդելու համար. «Եթե մարդիկ այս տարբերակներին դեմ են, պետք է այլընտրանքային տարբերակներ առաջարկեն, ընդ որում, ոչ լղոզված: Պետք է կոնկրետ ասեն, թե իրենք եթե լինեին՝ ինչ կանեին»: