Հայաստանի ընտրությունները տարբերվում են Ռուսաստանի ընտրություններից եւ շատ կարեւոր փորձություն են Հայաստանի համար: Այդ մասին այսօր` ապրիլի 6-ին լրագրողների հետ զրույցում նշել է վերլուծաբան, Տարածաշրջանային հետազոտությունների կենտրոնի տնօրեն Ռիչարդ Կիրակոսյանը:
«Մայիսին կայանալիք ընտրությունները պետք է լուրջ բարելավում գրանցեն, քան նախորդ ընտրությունները: Նախագահ Սերժ Սարգսյանի եւ վարչապետ Տիգրան Սարգսյանի անձնական խոստումները պետք է իրականություն դառնան»,- նշել է Կիրակոսյանը եւ հավելել. «Սա մարտահրավեր է եւ փորձություն ՀՀ իշխանությունների համար, սա նաեւ հնարավորություն է առաջ շարժվելու եւ հնարավորություն` ցույց տալու, որ խոստումները կատարվում են»:
Ըստ Կիրակոսյանի, ընտրությունը միայն քվեարկության օրը քվեարկելը չէ, այլ քաղաքական քննարկումների մակարդակի բարձրացումը:
