Թեման փակ է, այդպես էլ գրեք. սա էր «Ժառանգություն» կուսակցության խորհրդարանական խմբակցության քարտուղար Լարիսա Ալավերդյանի պատասխանը թերթի թղթակցին, երբ փորձում էին նրանից պարզել, թե ի՞նչ հարաբերությունների մեջ է «Ժառանգություն» կուսակցության առաջնորդ Րաֆֆի Հովհաննիսյանի հետ եւ պատրաստվո՞ւմ է, արդյոք, այս քարոզարշավի ժամանակ լինել կուսակցության կողքին:
«Հրաշալի հարաբերություններ ունեմ, եւ այդ թեման ինձ արդեն զարմացնում ու զայրացնում է, դրա մեջ ես անառողջ հետաքրքրություն եմ տեսնում»,- նշեց տիկին Ալավերդյանը եւ հավելեց, որ բոլոր այն անհամաձայնությունները, որ ունեցել կամ շարունակում է ունենալ Րաֆֆի Հովհաննիսյանի հետ, զուտ սկզբունքների շուրջ են, իսկ այս քարոզարշավում իր ակտիվության վերաբերյալ հարցն ընդամենը անառողջ է:
Թերթը նշում է, որ Լարիսա Ալավերդյանը, ով «Ժառանգության» համամասնական ցուցակում միայն 41-րդն է, ներկա չէր կուսակցության քարոզարշավի պաշտոնական բացման արարողությանը եւ, դատելով պատգամավորի տոնից, ենթադրվում է, որ չի մասնակցի նաեւ «Ժառանգության» եւ «Ազատ դեմոկրատների»` վաղը մեկնարկելիք նախընտրական հանդիպումներին ու մարզային այցելություններին:
