Google որոնողական կայքն այսօր վերափոխվել է շղթայի, իսկ նրա վրա կուրսորը պահելու դեպքում կայծակը բացվում է` հնարավորություն տալով տեղեկանալ այսօրվա մեր հագուստի այդ կարեւոր բաղադրատարրի ստեղծող Գիդեոն Սունդբեկի մասին:
Անիմացիոն շղթայի հետ կարելի է նաեւ խաղալ` այն մկնիկի օգնությամբ տանելով վերուվար: Որոնման համակարգն այդպիսով նշում է ստեղծողի ծննդյան 132-ամյակը:
«Շղթայի» առաջին նախատիպն ստեղծվել էր ամերիկացի Ուիթքոմ Ջադսոնի կողմից դեռեւս 1893 թվականին, սակայն նրա գործիքը բարդ սարքավորում էր եւ բավականին անապահով աշխատացնելիս: Բազմաթիվ փորձերից հետո, գտնվելով արդեն սնանկության եզրին, Ջադսոնը գործընկերներ է վերցրել, որոնք աշխատանքներին են ներգրավել շվեդական ծագմամբ ամերիկացի ինժեներ Գիդեոն Սունդբեկին, հայտնում է Calend-ը:
Մի քանի տարվա որոնումներից հետո Սունդբեկը «շղթայի» նոր տարբերակ եւ արտադրման տեխնոլոգիա է մշակել: Սունդբեկի հրաշք-հայտնագործությունը կազմված էր տեքստիլային երկու ժապավեններից, որոնց վրա ամրացված էին շախմատային կարգով դասավորված մետաղական ատամիկները: Կեսերի միացումն ու առանձնացումը կատարվում էր շղթայի «կողպեքի» միջոցով, որը սահում էր ժապավենների վրայով:
Շղթան կայծակնային արագությամբ գրավեց Ամերիկան, այնուհետեւ ամբողջ աշխարհը: