ԽՍՀՄ ժողովրդական արտիստ Իոսիֆ Կոբզոնին կրկին ամերիկյան վիզա չեն տրամադրել, հաղորդել է երգչի գրասենյակը:
Կոբզոնը մտադիր էր իր 75-ամյակի նախաշեմին մայիս-հունիսին հրաժեշտի շրջագայությամբ հանդես գալ Նյու Յորքում, Չիկագոյում եւ Բոստոնում: Այժմ շրջագայությունը չի կայանա, հաղորդում է argumenti.ru-ն:
Հիշեցնենք, Կոբզոնն արդեն 18 տարի է չի կարողանում գնալ ԱՄՆ: 1995թ. ԱՄՆ-ի պետդեպը զրոյացրել էր նրա բազմանգամյա վիզան` հիմնավորելով դա «վերահսկողության ենթակա դեղամիջոցների հետ կապված գործողություններում երգչի հնարավոր մասնակցությամբ»: Տվյալ որոշման ոչ պաշտոնական պատճառը երգչի հնարավոր կապերն են ռուսական կազմակերպված հանցավոր խմբավորումների հետ:
Կոբզոնի կարծիքով` ռուսական ուժային կառույցները, ովքեր հակամարտում էին Բորիս Ելցինի հետ, ամերիկացիներին իրեն վարկաբեկող տվյալներ են ասել, ինչն էլ վիզայի մերժման պատճառ է հանդիսացել: Պաշտոնապես պատճառները չեն հրապարակվել: Կոբզոնը հայտարարել է, որ եթե իր հետ կապված ինչ-որ հարցեր կան, ինքը պատրաստ է դրանց պատասխանել «ցանկացած ատյանի դատարանում` լինի դա Մոսկվայում, թե Նյու Յորքում»:
