Ֆրանսիայի նախագահական նոր վարչակազմը կարող է փոխել ներքին, բայց ոչ արտաքին քաղաքականությունը, այդ թվում` ղարաբաղյան հարցում: NEWS.am-ի թղթակցի հետ զրույցում նման կարծիք է հայտնել ադրբեջանցի քաղաքագետ, Խաղաղության եւ ժողովրդավարության ինստիտուտի կոնֆլիկտաբանության եւ միգրացիայի բաժնի ղեկավար Արիֆ Յունուսովը:
«Ռուսաստանի եւ Ֆրանսիայի իշխանական թիմերում փոփոխությունները լուրջ փոփոխությունների չեն հանգեցնի Լեռային Ղարաբաղի հարցում»,- կարծում է նա:
Հատկապես դա վերաբերում է Ֆրանսիային, որտեղ նոր նախագահի գալուստը նշանակում է հնարավոր փոփոխություններ ներքին քաղաքականությունում, բայց ոչ արտաքինում, «քանի որ Ֆրանսիայի նման երկրում շատ կարեւոր է ժառանգականությունը»: Ուստի Ֆրանսիայի դիրքորոշումը կլինի նույնը, ինչ Սարկոզիի օրոք:
«Ինչ վերաբերում է Ռուսաստանին, այստեղ անձնային խնդիր կա: Պուտինն ու Իլհամ Ալիեւը իրար այնքան էլ չեն համակրում, ինչն իր արտացոլումն է գտել Wikileaks-ի հրապարակած փաստաթղթերում»,- հիշեցրել է փորձագետը: Եւ այդ ոչ այնքան լավ անձնական հարաբերությունները անդրադառնալու են ադրբեջանա-ռուսական հարաբերությունների վրա:
«Միգուցե Պուտինը նույնպիսի ակտիվություն չի ցուցաբերի, ինչպես Մեդվեդեւը: նա նախկինում է այնքան մեծ հետաքրքրություն չուներ, ուստի չի ցուցաբերի նաեւ այժմ»,- հավելել է նա:
Նրա կրածիքով, եթե Ռուսաստանի, Ադրբեջանի եւ Հայաստանի նախագահների հանդիպումները շարունակվեն, դրանք կապված կլինեն այլ հարցերի հետ: «Ցանկացած դեպքում Ֆրանսիայի եւ Ռուսաստանի կողմից ղարաբաղյան հարցում որեւէ փոփոխություն ես չեմ սպասում»,- ամփոփել է Յունուսովը: