««Շանհայ էքսպո -2010» համաշխարհային ցուցահանդեսին ՀՀ մասնակցություն» ծրագրով արձանագրվել է ՀՀ պետական բյուջե վերականգման ենթակա գումար` 81.8 մլն դրամի չափով: Այդ մասին նշված է ՀՀ ֆինանսների նախարարության կողմից ՀՀ կառավարություն ներկայացրած «ՀՀ պետական բյուջեի կատարման նկատմամբ հսկողության 2011 թ. տարեկան արդյունքների վերաբերյալ» հաշվետվության մեջ:
Մասնավորապես` «Զարգացման հայկական գործակալություն» ՓԲԸ-ի կողմից «Մուլտիմեդիա ծրագրի պատրաստում» աշխատանքների գծով ծախս ցույց տրված 14.8 մլն. դրամը սկզբնական փաստաթղթերով չի հիմնավորվել, նշված գումարը 2010թ. փոխանցվել է «Արմենիան Սեքշըն օֆ 2010» ընկերության հաշվին եւ առանց համապատասխան հաշվետվության գումարը ձեւակերպվել ծախսերով:
Բացի այդ` ցուցահանդեսի Չինաստանից ներկրված 101.6 մլն դրամ գումարով ապրանքները մուտքագրվել են «Զարգացման հայկական գործակալություն» ՓԲԸ-ում, սակայն ՀՀ ֆինանսների նախարարությանը ներկայացված հաշվետվությունում որպես պահեստավորված միջոցներ չեն արտացոլվել: