ԵՄ-ն մի շարք առաջարկներ է պատրաստել ղարաբաղյան հիմնախնդրի կողմերի միջեւ վստահության ամրապնդման համար: Այդ մասին այսօր մամլո ասուլիսում հայտարարել է Ադրբեջանում ԵՄ-ի ներկայացուցչության ղեկավար Ռոլանդ Քոբիան:
«ԵՄ-ն մի շարք գաղափարներ է պատրաստել, որոնք կարող են նպաստել ղարաբաղյան հիմնախնդրի կողմերի միջեւ վստահության ամրապնդմանը: Դեռեւս նրանք չեն ընդունվել կողմերի կողմից», - նշել է նա: «Հուսով ենք, որ մոտ ապագայում կողմերը կընդունեն այդ առաջարկները: Եւ դա կլինի այն բանի նշան, որ կողմերն իսկապես ցանկանում են կարգավորել այդ հարցը», - ավելացրել է Քոբիան, հաղորդում է «ԱՊԱ»-ն:
Նա նշել է, որ ԵՄ-ն ցանկանում է ուժեղացնել իր աջակցությունը կարգավորման խաղաղ գործընթացին: Դրա ապացույցն է տարածաշրջանում հատուկ ներկայացուցիչ Ֆիլիպ Լեֆորի նշանակումը, որն ունի նաեւ հատուկ մանդատ Լեռնային Ղարաբաղի հարցի վերաբերյալ, ինչպես նաեւ ԵՄ-ի ցանկությունն է դիմել մի շարք միջոցների կողմերի միջեւ վստահությունն ամրապնդելու համար:
«Տվյալ առաջարկները քննարկվում են Հայաստանի եւ Ադրբեջանի հետ: Հակամարտությունը բավականին երկար է ձգվում, շփման եզրում զոհվում են մարդիկ: Մենք աջակցում ենք ԵԱՀԿ Մինսկի խմբի գործունեությանը, սակայն բացի պաշտոնական բանակցություններից շատ կարեւոր է վերականգնել վստահությունը մարդկանց միջեւ», - հայտարարել է դեսպանը:
