30-ամյա հայի սպանության կասկածյալին կախված են հայտնաբերել Եգորեւսկի բատախցում: Այդ մասին հայտնում է «Երկրամասը»` վկայակոչելով «MK»-ին:
Ըստ աղբյուրի տվյալների` կոնֆլիկտը տեղի է ունեցել հունվարի 18-ին: 5 մարդուց բաղկացած խումբը (3-ը հայ են եղել) հավաքվել էր հյուրանոցում իրենց 33-ամյա ծանոթուհի Մարիայի ծնունդը նշելու: Խնջույքի ժամանակ հյուրանոց է զանգել բոլոր մասնակիցների ընդհանուր ծանոթուհին` «Ագրովիտ» հանգստյան գոտու քարտուղարը, եւ օգնություն խնդրել: Ըստ աղջկա` անհայտ անձինք նրանից փող էին շորթում իբր անցյալ շաբաթ տեղի ունեցած ճանապարհային պատահարի պատճառով:
Երիտասարդները վախեցրել են դրամաշորթներին, եւ վերջիններս որոշել են հեռանալ: Վերադարձի ճանապարհին նրանց BMW-ն կանգնեցրել է «Մերսեդեսը», որից դուրս է եկել հրացանով մի տղամարդ եւ կրակել: Մեքենայի 30-ամյա վարորդը`Գուրգեն անունով, վիրավորվել է կրծքից եւ մահացել հիվանդանոցում: Տուժել են նաեւ BMW-ի երկու ուղեւորներ` 24-ամյա Արսենը եւ հոբելյարը:
Շուտով ձերբակալվել է կասկածյալը` Ռամենսկիի 32-ամյա բնակիչ Պավելը: Հետաքննության ընթացքում նրան նստեցրել են Եգորեւսկի բանտ, իսկ մայիսի 17-ին նրան կախված են հայտնաբերել: Պավելի հայրը բացատրել է, որ դրանից քիչ առաջ որդին, որը գտնվել է ընդհանուր խցում, խնդրել է, որ իրեն բժշկի մոտ տանեն: Երիտասարդին, որի երիկամը մի քանի տարի առաջ հեռացրել էին, ներարկում է անհրաժեշտ եղել: Երբ Պավելը միջանցք է դուրս եկել, նա, ըստ հոր, կոնֆլիկտ է ունեցել պահակի հետ: Վկաներն ասում են, որ կռիվ է եղել, Պավելին տարել են մեկուսարան, որտեղ նրան պարանով կախված են գտել: Հայրը վստահեցնում է, որ Պավելը հավատացյալ է եղել եւ երբեք նման մեղք չէր գործի:
Բացի դրանից նրա մամնի վրա հեմատոմաներ են հայտնաբերել, իսկ բժշկական զննումը ցույց է տվել, որ մահվանից առաջ Պավելի նկատմամբ ոտնձգություններ են իրականացվել: Ի դեպ, բանտի ղեկավարությունը հարազատներին ասել էր, որ տղամարդն ինքնասպան է եղել` վատ լուրեր լսելով փաստաբանից: Մինչդեռ, ըստ հոր, փաստաբանը հենց լավ լուրեր էր բերել` երիտասարդը պետք է դուրս գար մայիսի վերջին բավականաչափ ապացույցներ չլինելու պատճառով:
Իրավապահները, որոնց դիմել են Պավելի հարազատները, մտադիր են դիմել հետաքննչական հանձնաժողովին, քանի որ հիմքեր կան ենթադրելու, որ տղային դրդել են ինքնասպանության: Այժմ մարմինն ուղարկվել է կրկնակի փորձաքննության: