Ազգային ժողովի նախկին պատգամավոր, «Բարգավաճ Հայաստան» կուսակցության անդամ Վարդան Բոստանջյանին որեւէ աշխատանքի առաջարկ չի արվել, եւ եթե որեւէ առաջարկ արվի, ապա դա հավանաբար կլինի Կառավարության ձեւավորումից հետո: Այս մասին NEWS.am-ի թղթակցի հետ զրույցում ասաց անձամբ Վարդան Բոստանջյանը: «Հասկանալի պատճառներով, քանի որ գնում է ձեւավորման պրոցես, բնականաբար, ես մտածում եմ, որ այդ գործընթացները պետք է ավարտվեն, որից հետո առաջարկություններ լինեն կամ չլինեն»,- ասաց նա:
Նա այժմ շարունակում է զբաղվել դասախոսական գործունեությամբ: «Քանի որ այդ գործը կա, հնարավոր է նաեւ առաջարկությունններ չլինեն, քանի որ ես արդեն գործ ունեմ»,- ասաց նա:
Վարդան Բոստանջյանը նշեց, որ աշխատանքի առաջարկությունների դեպքում իր համար գերադասելի է իր մասնագիտությանը համապատասխան որեւէ աշխատանք: Ինչ վերաբերում է Կենտրոնական բանկի խորհրդի անդամ դառնալու մասին տեղեկություններին, նա նշեց, որ նման առաջարկ չի արվել:
Հարցին, թե «Կենտրոնական բանկի մասին» օրենքի 19 հոդվածի 5-րդ կետի համաձայն` ԿԲ խորհրդի անդամները չեն կարող լինել որեւէ կուսակցության ղեկավար մարմնի անդամ, դուք պատրա՞ստ եք այդ պաշտոնի համար հրաժարվել ԲՀԿ-ի անդամությունից, նա այսպես արձագանքեց. «Ես իհարկե չեմ ուզում «եթե»-ներով առաջնորդվել, բայց հասկանում եմ, որ յուրաքանչյուր քաղաքացի պետք է լինի մասնագետ եւ օգտակար իր երկրի համար: Եթե մասնագիտական առումով անհրաժեշտություն կա տեղադրվել որեւէ տեղում, ապա պարզ չէ, որ առաջին տեղում մասնագիտությունն է, եւ մասնագիտությամբ աշխատելու համար օրենքի պահանջները չկատարել չի կարելի», - ասաց Վարդան Բոտսանջյանը` հավելելով, որ եթե նման առաջարկ լինի եւ անհրաժեշտ լինի ԲՀԿ-ից դուրս գալ, ապա նա կանի այդ քայլը:
Իսկ թե ԲՀԿ-ից դուրս գալուց հետո կդադարեցնի՞ իր կապերը այդ կուսակցության հետ, հարցին էլ արձագանքեց, որ կապերը պահպանում են նրանք, ովքեր ակնկալիքներ ունեն, իսկ ինքը որեւէ ակնկալիքներ չի կարող ունենալ, հետեւաբար` ինքնըստինքյան կնվազեն կապերը:
Նշենք, որ լրատվամիջոցներում տեղեկություններ էին տարածվել, թե ԱԺ նախկին պատգամավոր Վարդան Բոստանջյանը կնշանակվի Կենտրոնական բանկի խորհրդի անդամ:
