Հայաստանի նախագահ Սերժ Սարգսյանն, այսօր` հունիսի 12-ին, երկրի բարձրագույն ղեկավարության ուղեկցությամբ այցելել է Կոմիտասի անվան զբոսայգու պանթեոն` Հայաստանի նախկին վարչապետ, ՀՀԿ նախկին նախագահ Անդրանիկ Մարգարյանի ծննդյան օրվա կապակցությամբ:
Պետական այրերը հարգանքի տուրք են մատուցել Անդրանիկ Մարգարյանի հիշատակին, ծաղկեպսակներ դրել նրա շիրիմին:
«Անդրանիկ Մարգարյանը եղել է հմուտ քաղաքական գործիչ, որը փորձությունների, դժվարությունների, հաղթանակների միջով մեծ ճանապարհ է անցել»,- լրագրողների հետ ճեպազրույցում նշեց ՀՀ վարչապետ Տիգրան Սարգսյանը: «Այդ փորձությունը նրան սովորեցրել է տարբեր մարդկանց հետ գտնել համագործակցության ընդհանուր եզրեր, պետականության ամրապնդման գործում իր դերը ունենալ: Չկա այդպիսի կառավարություն, որը խնդիրներ չունենա: Մեր անկախ պետությունը ունի դեռեւս չլուծված բազմաթիվ խնդիրներ, ժամանակակից մարտահրավերներ:
Անդրանիկ Մարգարյանը հմուտ ազգային գործիչ էր, որն ամբողջությամբ իրեն նվիրել էր մեր պետականության ձեւավորմանը: Նա գաղափարի մարդ էր եւ իր կենսագրությամբ դա ապացուցեց: Մեր ընդհանուր պատգամն այն է, որ մենք պետք է կարողանանք համագործակցության ներքո գտնել ուղիներ մեր պետությունն ամրապնդելու համար:
Մենք ընկերներ ենք եղել եւ միասին մեծ ճանապարհ ենք անցել սկսած 1988թ-ից: Ինքը ընդհանրապես շատ համեստ մարդ էր, եւ չէր սիրում, որ իր անձի շուրջ ձեւավորվեր արհեստական մթնոլորտ: Ցանկացած շփման ժամանակ գործում էր անմիջականությունը, եւ իր անմիջական բնավորությունը նրան օգնում էր նորմալ, մարդկային հարաբերություններ կառուցեր բոլորի հետ»,-ասաց վարչապետը:
Լուսանկարը` Սոնա Բարսեղյանի