Բաշար Ասադի օրերը հաշված են, սակայն ռեժիմը կարող է մնալ այնքան ժամանակ, քանի դեռ բողոքի ակցիաները տեղի են ունեում երկու գլխավոր քաղաքներից` Դամասկոսից եւ Հալեպից դուրս: Այս մասին «United Press International» գործակալությանը տված հարցազրույցում ասել է Սիրիայում ԱՄՆ նախկին դեսպան Էդվարդ Ջերեջյանը:
Նրա խոսքով` երկու խոշոր քաղաքներում հարաբերական հանգիստը պահպանվում է ռազմաքաղաքական անվտանգության կլանային ապարատի շնորհիվ, որը ստեղծվել է Ասադի հոր` Հաֆեզի կողմից: Սակայն իրավիճակը փոքր-ինչ սկսում է փոխվել` ավելի շատ միջադեպեր են տեղի ունենում խոշոր քաղաքներում եւ արվարձաններում:
Էդվարդ Ջերեջյանը կարծում է, որ Ասադի իշխանության մնալու եւս մեկ գործոն է ընդդիմադիր խմբերի միջեւ համաձայնության բացակայությունը եւ նրանց աշխարհագրական տեղակայվածությունը:
«Կարող է Սերեբրենիցայի նման ինչ-որ բան լինել. այն դեպքում, երբ հումանիտար ճգնաժամը անհաղթահարելի լինի, միջազգային հանրությունը վճռական գործողություններ կձեռնարկի»,-ասել է նա: Ճգնաժամի բացակայության դեպքում, Արեւմուտքը դիվանագիտորեն կգործի` ճնշում գործադրելով ռեժիմի վրա եւ աջակցելով ընդդիմությանը:
«Կարծում եմ, մեծամիտ է ենթադրել, թե ԱՄՆ-ը, Ռուսաստանը կամ ցանկացած արտաքին ուժ կարող են որոշել իրադարձությունները Սիրիայում: Միջազգային հանրությունը կարող է ազդել, բայց չի կարող որոշել Սիրիայում իրադարձությունների զարգացումը»,-եզրափակել է նա:
