Վրաստանում աշնանը կայանալիք խորհրդարանական ընտրություններն անցած մյուս ընտրություններից առանձնապես չի տարբերվի: Այս մասին NEWS.am-ի թղթակցին ասաց հայ համայնքի ներկայացուցիչ Սանդրո Օհանյանը: Նրա խոսքով, հայ համայնքն ընդհանուր առմամբ անտարբեր է ընտրությունների եւ դրանց արդյունքների նկատմամբ, քանի որ Վրաստանի եւ ոչ մի քաղաքական ուժ իր առջեւ երկրի ազգային փոքրամասնությունների հարցերով զբաղվելու խնդիր չի դնում:
«Վրաստանում տարբեր կուսակցություններ կան, որոնցից յուրաքանչյուրը այս կամ այն հարցի վերաբերյալ տարբեր մոտեցում ունի, սակայն ազգային փոքրամասնություններրի հարցում մոտեցում ոչ մեկը չունի: Քաղաքական ուժերի նախընտրական ծրագրերում ազգային փոքրամասնությունների մասին որեւէ բան ասված չէ»,-ընդգծեց նա` ավելացնելով, որ թեեւ Վրաստանում հայերը, ինչպես եւ մյուս քաղաքացիները, լուծման կարիք ունեցող շատ խնդիրներ ունեն, ոչ ոք ձեռնամուխ չի լինում այդ գործին: Նման հարցերի թվում Օհանյանը նշեց լեզվի եւ կրոնի հարցերը:
Միաժամանակ հայ համայնքի ներկայացուցիչը նշեց, որ խոսքը բոյկոտի մասին չէ: «Բոյկոտն այստեղ կապ չունի: Պարզապես միասնական համայնք որպես այդպիսին չկան, չկան կառուցվածքներ: Որոշ կազմակերպություններ, որոնք մոտ են իշխանություններին, քարոզչություն են կատարում նրանց օգտին, որոշները ձգտում են ընդդիմադիր «Վրացական երազանք» կուսակցությանը, իսկ համայնքի շարքային անդամները ում կուզեն` նրա օգտին կքվեարկեն»,-եզրափակեց Օհանյանը:
Նշենք, որ Վրաստանում ընտրությունները տեղի կունենա հոկտեմբերին:
