Վրաստանի տարածքով Հայաստան-Ռուսաստան երկաթուղային հաղորդակցության հեռանկարը շատ մշուշոտ է: Այս մասին NEWS.am-ի թղթակցի հետ զրույցում ասաց քաղաքագետ, Կովկասի ինստիտուտի փոխտնօրեն Սերգեյ Մինասյանը: Նրա խոսքով, Վրաստանը հետաքրքրված է բանակցությունների փաստով, սակայն կգնա արդյոք այս կամ այն գործնական քայլի` այս հարցը մնում է երկար, բարդ բանկցությունների առարկա: Մինասյանը հիշեցրել է, որ այդ նախագծի վերաբերյալ առաջին բանակցությունները տեղի են ունեցել դեռեւս Ռոբերտ Քոչարյանի եւ Էդվարդ Շեւարդնաձեի օրոք, սակայն այդ ժամանակ չհաջողվեց համաձայնություն ձեռք բերել:
«Հավանաբար, նման բանակցություններ կամ գոնե կարծիքի ուսումնասիրում արվում է: Այդ մասին է վկայում Հայաստան այցի նախօրեին Վրաստանի ԱԳ նախարար Վաշաձեի հարցազրույցը, որտեղ նա բացասաբար է արտահայտվել այդ նախագծի մասին` այդպիսով նախապես կանխորոշելով վրացական կողմի դիրքորոշումը»,-նշեց Մինասյանը:
Զրուցակցի կարծիքով`Մոսկվայի եւ Թբիլիսիի յուրահատուկ հարաբերությունների համատեքստում այդ նախագիծն ավելի թափանցիկ է թվում, եթե հաշվի առնվի Վրաստան-Ադրբեջան երկաթգծի եւ Վրաստանի ծովային նավահանգիստների առկայությունը: «Առավել եւս, որ Թբիլիսիի աչքին այդ հարցը վառ քաղաքական երանգ ունի»,-նշեց քաղաքագետը:
Նշենք, որ վերջին մի քանի օրերին ԶԼՄ-ներում լուրեր են շրջանառվում այն մասին, թե Հայաստանն ու Ռուսաստանն ակտիվացնում են Վրաստանի նկատմամբ ճնշումը` նրան ստիպելու համար համաձայնություն տալ նախագծին: