Իրաքի տարբեր շրջաններում, հուլիսի 23-ին, ահաբեկչությունների շարքի եւ հարձակումների հետեւանքով ավելի քան 90 մարդ է զոհվել, հաղորդում է AFP-ն` վկայակոչելով տեղի իշխանություններին եւ բժիշկներին:
Reuters-ի տվյալներով, վիրավորների թիվն անցել է 140-ից: Սա վերջին 2 տարում ամենաշատ զոհերի եւ վիրավորների հանգեցրած ահաբեկչությունների շարքն է մեկ օրվա ընթացքում:
Գործակալության փոխանցմամբ, գրոհայինները հարձակվել են, մասնավորապես, Իրաքի հյուսիս-արեւելքում գտնվող Ուդեյմ քաղաքի ռազմակայանի վրա, սպանելով 13 զինծառայողների:
Երկրի մայրաքաղաք Բաղդադում գրոհայինները կառավարության շենքի մոտ պայթուցիկ սարք են գործի դրել, որտեղ բնակիչներին նույնականացման քարտեր էին տրամադրում:
Հաղորդվում է նաեւ, որ եւս մի քանի պայթյուններ են գրանցվել քաղաքում, որտեղ գրոհայինները պայթեցրել են մի քանի տներ, իսկ երբ դեպքի վայրեր են սկսել ժամանել ոստիկաններն ու բժիշկները, մահապարտ-ահաբեկիչը գործ է դրել եւս մեկ պայթուցիկ սարք:
Reuters-ի տվյալներով, այդ ահաբեկչությունների հետեւանքով Բաղդադի արվարձանում մահացել է 40 մարդ: Քիրքուք քաղաքում պայթեցվել են առնվազն 4 ականապատված մեքենաներ:
Մի շարք ահաբեկչություններ են տեղի ունեցել նաեւ Դյալա նահանգում, հաղորդում է «ՌԻԱ նովոստին»: