Հուլիսի 19-ին կայացած ԼՂՀ-ի նախագահի ընտրությունները եղել են արդար, ազատ: Այդ մասին հուլիսի 23-ին Երեւանում կայացած մամուլի ասուլիսում հայտարարել է Սեւծովյան-Կասպյան տարածաշրջանի քաղաքական եւ սոցիալական հետազոտությունների ինստիտուտի աշխատակից Անդրեյ Արեշեւը: Ըստ նրա`գրեթե բոլոր դիտորդները բարձր են գնահատել ընտրությունների ընթացքը, ընդ որում` նրանց շարքում եղել են ներկայացուցիչներ Ռուսաստանից, ԵՄ-ի երկրներից, Կանադայից եւ այլ պետություններից:
«Ընտրություններում 75-%-անոց մասնակցությունը կարող է նախանձի առարկա դառնալ ԱՊՀ մյուս երկրների համար: Ավելին, ընտրությունների արդյունքներն արդեն խոսում են իրենք իրենց մասին: Ձայների 30%-ը տրվել էր ընդդիմադիր թեկնածուին, եւ հետո վերջինիս կողմից ընտրությունների արդյունքների ճանաչումը խոսում է դրանց կազմակերպվածության բարձր մակարդակի մասին», - նշել է Արեշեւը, ընդգծելով, որ այդ ընտրությունները սովորական նշում անել չէին:
Ըստ Արեշեւի` ձայների վերաբաշխումն արդեն վկայում է շատ բանի մասին: «Գործող նախագահի օգտին 65% ձայնը վկայում է այն մասին, որ անցած 5 տարիների ընթացքում երկրում շատ բան է դեպի լավը փոխվել: Մինչդեռ ընդդիմադրի 30%-ը շատ խնդիրներ է մատնանշում` կաշառակերություն, պասիվ արտաքին քաղաքականություն եւ այլն, որոնց նկատմամբ դժգոհությունը ժողովուրդը կարող է արտահայտել ընտրություններով», - նշել է նա:
Անդրեյ Արեշեւը ԼՂՀ-ի նախագահական ընտրությոններում Ռուսաստանի դիտորդների կազմում էր: Քաղաքագետը պատմել է, որ եղել է երկրի մի քանի շրջաններում` Մարտունիում, Ասկերանում, Հադրութում, Ստեփանակերտում: «Ընտրական գործընթացն ամենուր կազմակերպված էր բարձր մակարդակով: Ես եղա գյուղերում, ուր մարդիկ վերջին 20 տարում դիտորդ չէին տեսել:
Նույնիսկ այնտեղ ամեն ինչ բարձր մակարդակով էր», - ասել է նա, վերջում հավելելով, որ ԼՂՀ-ի նախագահի ընտրութուններն օրինակ կարող են ծառայել ժողովրդի կողմից իրենց իշխանությունը ժողովրդավարական ճանապարհով ընտրելու համար: