Օտարերկրյա ներդրումները Հայաստանում 2012թ. հունվար-հունիսին կազմել են 266.1 մլն.դոլար, որը2011թ. նույն ժամանակաշրջանի համեմատ նվազել է 39.4%-ով; Այդ մասին տեղեկացնում է ՀՀ ազգային վիճակագրական ծառայությունը: Դրանցից ուղղակի ներդրումների ծավալը կազմել է 147.5 մլն. դոլար` նվազելով 59.7%-ով:
Օտարեկրյա ներդրումների նվազումը պայմանավորված է հիմնականում Ռուսաստանի, Ֆրանսիայի եւ ԱՄՆ-ի ընկերությունների ներդրումային պասիվությամբ:
Մասնավորապես` ռուսական ներդրումները առաջին կիսամյակում կազմել են ընդամենը 40 մլն դոլար, ինչը 5 անգամ զիջում է նախորդ տարվա ցուցանիշին: Ֆրանսիական ներդրումները կազմել են 24 մլն դոլար` մոտ 3 ագամ ավելի քիչ, քան 2011 թ.: Իսկ ամերիկյան ներդրումները նվազել են 5 անգամ` հասնելով 7.8 մլն դոլարի: Ռուսական ներդրումների անկումը պայմանավորված է հիմնային մետաղների արտադրության ոլորտում ներդրումների բացակայությամբ (2011 թ. այս ոլորտ ուղղվել էր 144 մլն դոլար ռուսական կապիտալ, ըստ երեւույթին` կապված «Արմենալի» վերազինման հետ): Իսկ ֆրանսիական ներդրումների նվազումը հիմնականում պայմանավորված է հեռահաղորդակցության ոլորտում «Օրանժ Արմենիայի» ներդրումային ծրագրերի նվազմամբ:
Փոխարենը` 5.7 անգամ ավելացել են կանադական ընկերությունների ներդրումները, ինչի հետեւանքով Կանադան 82 մլն դոլար ցուցանիշով հանդիսանում է Հայաստանում խոշորագույն ներդրողը: Սակայն կանադական ներդրումների մեջ բացակայում են ուղղակի ներդրումները: Կանադական ներդրումները հիմնականում ուղղվել են մետաղական հանքաքարի արդյունահանման ոլորտ:
4.1 անգամ ավելացել են Շվեյցարիայի ներդրումները, ինչի հետեւանքով Շվեյցարիան 26 մլն դոլար ցուցանիշով երրորդ խոշոր ներդրող երկիրն է (Ռուսաստանից հետո): Սա, ըստ երեւույթին, կապված է Կոտայքի մարզի Արտավազ գյուղի մերձակայքում շվեյցարական ընկերություններից մեկի կողմից հանքային ջրերի գործարան կառուցելու հետ:
Նշենք, որ օտարերկրյա ներդրումների 45%-ը (մոտ 120 մլն դոլար) ուղղվել է հանքարդյունաբերություն (ներառյալ` հանքային ջրեր):
Հեռահաղորդակցության ոլորտ է ուղղվել 47 մլն դոլար, անշարժ գույքի շուկա` մոտ 24 մլն դոլար: