Մեծ Բրիտանիայի նախկին վարչապետ Թոնի Բլերը Glencore եւ Xstrata գործարքի 3 ժամ բանակցություններին մասնակցելու համար վաստակել է 1 միլիոն դոլար:
Ըստ The Daily Mail հրատարակչության` Բլերը Glencore-ի ղեկավար Այվան Գլայզենբերգի եւ Քաթարի վարչապետ Համադ բին Ջաբեր ալ-Թանիի փակ հանդիպմանը միջնորդի դերում էր հանդես գալիս: Հանդիպումը տեղի է ունեցել Լոնդոնի շքեղ Claridge հյուրանոցում:
Ըստ թերթի աղբյուրի` Բլերը Քաթարի թագավորական ընտանիքում մեծ վստահութուն է վայելում:
Ինչպես գրում է «gazeta.ru»-ն, երկու ընկերությունների միաձուլման մասին հայտնի էր դարձել այս տարվա փետրվարին: Այն ժամանակ խոշորագույն Glencore-ը Xstrata-ի յուրաքանչյուր բաժնետոմսի դիմաց առաջարկել էր իր բաժնետոմսերի 2,8-ը: Գործարքի ավարտից հետո կձեւավորվի 82 միլիարդ դոլարանոց հսկա: Միաձուլման դեմ է հանդես եկել Xstrata-ի խոշորագույն բաժնետերերից մեկը`քաթարյան Qatar Holding հիմնադրամը (որին պատկանում է Xstrata-ի 12%-ը): Հիմնադրամը պահանջում էր Glencore-ի 3,2 բաժնետոմս Xstrata-ի մեկ բաժնետոմսի դիմաց:
Բանակցությունների ընթացքում Գլայզենբերգը համաձայնել էր Qatar Holding-ի պահանջներին, սակայն առաջադրել էր մեկ պայման` նոր ընկերոթյունը պետք է ղեկավարի նա անձամբ, այլ ոչ թե Xstrata-ի ղեկավար Միկ Դեւիսը, ինչպես որ ենթադրվել էր նախկինում: Xstrata-ն պետք է պատասխանի սեպտեմբերի վերջին:
