Հունգարիայի կողմից Ռամիլ Սաֆարովին Ադրբեջան արտահանձնելու հետ կապված հարցերը առայժմ չեն կարող փակված համարվել: Այդ մասին հայտարարել է Հունգարիայի արտաքին գործերի պետքարտուղար Ժոլտ Նեմետը:
Ինչպես հայտնում է հունգարական MTI լրատվական գործակալությունը, Nepszabadsag թերթի հետ հարցազրույցում Նեմետն ընդգծել է, որ պաշտոնական Բուդապեշտի որոշումը «բազմաթիվ հետեւանքներ եւ խնդիրներ է առաջ բերել», այդ թվում` Հայաստանի հետ լարվածություն: Նա նաեւ նշել է, որ ԱՄՆ-ի հետ երկկողմ վստահության լուրջ կորուստ կա»` հավելելով, սակայն, որ դրա հիմքում ընկած է «մեծ թյուրիմացությունը»:
Պետքարտուղարը վստահեցրել է, որ Հունգարիան բոլոր ջանքերը կգործադրի Հայաստանի հետ հարաբերությունների վերականգնման համար: Ըստ նրա`հաջորդ մի քանի ամիսների ընթացքում Երեւանի հետ պաշտոնական հարաբերությունների վերականգնումը «իրատեսական նպատակ է»:
Նեմետը նաեւ վստահեցրել է, որ Սաֆարովի արտահանձնման դիմաց Հունգարիային «ոչ մի ուղղակի փոխհատուցում» չի տրվել: Նա նաեւ նշել է, որ «Ադրբեջանը կարեւորագույն գործընկեր է ոչ միայն Հունգարիայի, այլեւ Եվրոպայի համար», քանի որ «հարուստ է նավթով եւ գազով, եւ այն Եվրոպա էներգամատակարարման տարանցիկ այլընտրանքային ուղի դառնալու ներուժ ունի»:
Ըստ պետքարտուղարի` Ադրբեջանի կողմից Սաֆարովի ներումը բացասական ազդեցություն չի ունենա հունգարա-ադրբեջանական տնտեսական հարաբերությունների վրա, չնայած որ այն հետք է թողել հունգարական կառավարությունում:
