Ռամիլ Սաֆարովի գործը իրական մարտահրավեր է այն արժեքների նկատմամբ, որոնց հետեւում է Եվրոպայի խորհրդի Խորհրդարանական վեհաժողովը: Այս մասին հոկտեմբերի 1-ին մեկնարկած ԵԽԽՎ-ի աշնանային նիստում իր ելույթում հայտնել է կազմակերպության ղեկավար Ժան-Կլոդ Մինյոնը:
«Մեր քաղաքական մոդելի հիմքում ընկած է արժեքների եւ չափորոշիչների միասնությունը եւ մենք մեզ վրա դրանով առաջնորդվելու պարտականություն ենք վերցրել: Մեր համագործակցությունը փոխադարձ վստահության եւ բարի կամքի վրա է հիմնված: Ահա, թե ինչու Սաֆարովի գործը, իմ կարծիքով, լուրջ մարտահրավեր է այն արժեքների նկատմամբ, որոնց մենք հետեւում ենք այս կազմակերպությունում»,-հայտնել է Մինյոնը, ավելացնելով, որ տվյալ հարցը պետք է քննարկվի աշնանային նստաշրջանի շրջանակներում:
«Պարոն Սաֆարովի կողմից իրականացված հրեշավոր հանցագործության փառաբանումը անընդունելի է, եւ ես խորապես ցավում եմ այն բանի համար, որ հացագործը ներման է արժանացել Եվրոպայի խորհրդի կողմից մշակված այն իրավական գործիքների օգնությամբ, որոնք ուղղված են իրական «մարդասիրական նպատակներին», ավելացրել է ԵԽԽՎ-ի ղեկավարը:
Օրակարգի քննարկման ընթացքում որոշվել է, որ Սաֆարովի հարցը քննարկվելու է դեբատների ժամանակ` հոկտեմբերի 4-ին:
2004 թ-ի փետրվարին Բուդապեշտում ՆԱՏՕ-ի «Համագործակցություն հանուն խաղաղության» ծրագրի շրջանակներում ընթացող անգլերեն լեզվի դասընթացի մասնակից ադրբեջանցի սպա Ռամիլ Սաֆարովը փետրվարի 19-ի գիշերը կացնահարել է նույն ծրագրի մասնակից հայ սպա Գուրգեն Մարգարյանին, երբ վերջինս քնած է եղել: 2006 թ-ի ապրիլի 13-ին հունգարական դատարանը Սաֆարովին ցմահ ազատազրկման է դատապարտել` մոտակա 30 տարիների ընթացքում առանց ներման իրավունքի: Սակայն 8 տարի անց` 2012 թ-ի օգոստոսի 31-ին Հունգարիան Ադրբեջանին է արտահանձնել Սաֆարովին, ով հայրենիք հասնելուն պես ներման է արժանացել Ադրբեջանի նախագահի կեղմից: Նույն օրը Երեւանը կասեցրել է դիվանագիտական հարաբերությունները Հունգարիայի հետ: