Քվեարկությունից մեկ ամիս առաջ հանրապետական թեկնածու Միթ Ռոմնին առաջ է անցել Սպիտակ տան ղեկավար Բարաք Օբամայից: Այդպիսին են հասարակական կարծիքի Pew Research Center-ի հարցման արդյունքները:
Ռոմնիի օգտին պատրաստ են քվեարկել 49, իսկ Օբամայի օգտին` 45%-ը: Գործող նախագահը հեռուստաբանավեճերի մեկնարկից հետո կորցրել է ձայների 10 տոկոսը:
Փորձագետները կարծում են, որ հոկտեմբերի 3-ի հեռուստաբանավեճի արդյունքում «ամերիկացիները Ռոմնիին ընկալում են որպես նոր գաղափարների կրող եւ ունակ լուծելու նոր աշխատատեղերի ստեղծման խնդիրներն ու բյուջեի դեֆիցիտի կրճատման հարցը»: Ըստ ամերիկացիների` հեռուստաբանավեճի ժամանակ հանրապետականն «ավելի վստահ է եղել»:
Նշվում է նաեւ, որ Ռոմնիի ժողովրդականությունն ավելի է աճել շնորհիվ 50 տարեկանից ցածր սպիտակամորթ կանանց, հայտնում է «Ռոսբալտը»:
ԱՄՆ-ի նախագահի թեկնածուները հոկտեմբերի 4-ին ուղիղ եթերում անցկացրել են բանավեճերի առաջին փուլը: Հանդիպումը տեղի է ունեցել Դենվերի համալսարանում, քննարկվել են հարկային դաշտը, առողջապահությունը, բյուջեի պակասուրդը եւ դաշնային կառավարության գործառույթները:
Ըստ CNN -ի եւ ORC International-ի համատեղ հարցման արդյունքների` հաղթել է Ռոմնին:
Այս շաբաթ բանավեճեր տեղի կունենան փոխնախագահի թեկնածուներ՝ դեմոկրատ Ջո Բայդենի եւ Վիսկոնսին նահանգի սենատոր, հանրապետական Ռայան Փոլի միջեւ: Սպիտակ տան ղեկավարի ընտրությունները տեղի կունենան նոյեմբերի 6-ին: