Հայ փրկարարները «Վրաստան - 2012» զորավարժությունների արդյունքում զորավարժությունների հրամանատարության եւ Հայաստանի ԱԻՆ-ի կողմից արժանացել են քաջալերման եւ հատուկ մրցանակի: Այդ մասին այսօր` հոկտեմբերի 11-ին կայացած մամուլի ասուլիսում հայտնել է Հայաստանի ԱԻՆ ջրափրկարարական հատուկ ջոկատի հրամանատար, գնդապետ Սամվել Մկրտչյանը:
Զորավարժությունները կայացել են սեպտեմբերի 22-27-ին Թբիլիսիի մերձակայքում: Հայկական պատվիրակության կազմում տարբեր ուղղությունների շուրջ 50 փրկարարներ են եղել` որոնողափրկարարական եւ քիմիական ջոկատի ներկայացուցիչներ, ջրափրկարարներ, պարամեդիկներ եւ շնաբաններ:
Նշենք, նմանատիպ զորավարժություններ Հայաստանում անց էին կացվել 2010թ., 2011թ.` Մոլդովայում: Զորավարժություններն անց են կացվել Աղետների արձագանքումը համակարգող եվրոատլանտյան կենտրոնի հովանու ներքո:
Ինչպես հայտնել է Սամվել Մկրտչյանը, Հայաստանի ԱԻՆ ներկայացուցիչ, պրապորշչիկ Արմեն Եփրեմյանը Ղրղըզստանում մասնակցել է ջրասուզորդների որակավորման բարձրացման դասընթացների:
«Նա գերազանց արդյունք է ցուցաբերել, ինչի շնորհիվ հաջորդ տարի Հայաստանից երկու ներկայացուցիչների են հրավիրել դասընթացների», - հայտնել է Սամվել Մկրտչյանը: Դասընթացներն անցկացվել են Իսիկ Կուլ լճում:
