ՆԱՏՕ-ն ցանկանում է Հայաստանի եւ Ադրբեջանի միջեւ հարաբերությունների բարելավում տեսնել: Այդ մասին այսօր՝ նոյեմբերի 5-ին հայ լրագրողների հետ զրույցում հայտնել է Հարավային Կովկասի եւ Կենտրոնական Ասիայի հարցերով ՆԱՏՕ-ի պետքարտուղարի հատուկ ներկայացուցիչ Ջեյմս Ապաթուրայը:
Պատասխանելով Ադրբեջանի պաշտպանության նախարարության վերջին հայտարարության մասին հարցին, որում սպառնացել էին «հարվածել Հայաստանի այն օբյեկտին, որը հարցականի տակ կդնի Հայաստանի՝ իբրեւ պետության գոյությունը», ՆԱՏՕ-ի ներկայացուցիչը հայտնել է, որ ծանոթ չէ այդ հայտարարությանը:
«Վերջերս տեղի է ունեցել Գլխավոր քարտուղարի այցը տարածաշրջան: Նա այցելել է տարածաշրջանի բոոր 3 երկրներ եւ մտահոգված էր 2 երկրների միջեւ եղած տարաձայնություններով», - նշել է Ջեյմս Ապաթուրայը: «Վերջերս Փարիզում կայացել է ԱԳՆ-ների ղեկավարների հանդիպումը, եւ դա լավ նշան է: Սակայն հանդիպումը դեռեւս առաջընթաց չէ, այլ միայն՝ քայլ առաջ: Ինչ վերաբերում է ՆԱՏՕ-ին, մենք ցանկանում ենք բարելավում տեսնել հարաբերություններում», - ընդգծել է Դաշինքի ներկայացուցիչը:
Հայաստանում ԱՄՆ-ի արտակարգ եւ լիազոր դեսպան Ջոն Հեֆերնը նույնպես ծանոթ չէր այդ սպառնալիքին: «ԱՄՆ-ն` որպես ԵԱՀԿ Մինսկի խմբի անդամ, օգտագործում է ցանկացած հնարավորություն, որպեսզի երկրներին կոչ անի նվազեցնել ռազմատենչ հայտարարությունների լարվածությունը եւ վերադառնալ բանակցություններին: Մենք ողջունում ենք նախարարների հանդիպումը եւ շարունակում ենք ղարաբաղյան հիմնախնդրի խաղաղ կարգավորման եւ Հայաստանի ու Ադրբեջանի միջեւ հարաբերությունների բարելավման կոչ անել», - հայտարարել էր ԱՄՆ-ի դեսպանը:
