Նոյեմբերի 9-ից 17-ը Հայաստանում էր Շվեյցարիայի միջազգային զարգացման եւ համագործակցության գործակալության փորձագետ Անտոն Բյիլանգը:
Ա. Բյիլանգը Հայաստանի Արտաքին իրավիճակների նախարարության մասնագետների հետ քննարկել է Հայաստանում Շվեյցարիայի միջազգային զարգացման եւ համագործակցության գործակալության հետ համատեղ «Արագ արձագանքման միջին փրկարարական թիմերի ստեղծումը շրջաններում» պիլոտային ծրագրի իրականացման խնդիրը:
Ա. Բյիլանգը ՀՀ ԱԻՆ աշխատանքային խմբի ներկայացուցիչների հետ այցելել է Շիրակի մարզ, որտեղ անցկացվել է վարժանք` փրկարարների եւ ուսուցում անցած բժիշկների մասնակցությամբ:
Ուսումնասիրվել են հատուկ փրկարար ջոկատի եւ ՀՀ ԱԻՆ Ճգնաժամային կառավարման պետական ակադեմիայի հնարավորությունները:
Ռիսկերի գնահատումից հետո, որոշում է կայացվել ծրագիրը իրականացնել Երեւանում, Շիրակի եւ Սյունիքի մարզերում: Ծրագրի իրականացման արդյունքում Երեւանում, Շիրակի եւ Սյունիքի մարզերում ստեղծվելու են INSARAG–ի չափանիշներին համապատասխան միջին փրկարարական թիմեր, որոնք կարող են արձագանքել խոշոր աղետներին եւ իրականացնել փրկարարական աշխատանքներ:
Ծրագիրն անցկացվելու է 2013–2014 թվականներին: Ստեղծվող փրկարարական թիմերը ապահովվելու են Շվեյցարիայի միջազգային զարգացման եւ համագործակցության գործակալության կողմից անհրաժեշտ գույքով եւ փրկարարական տեխնիկական միջոցներով եւ համատեղ ուսուցմամբ` ՀՀ ԱԻՆ մասնագետների հետ:
Ծրագիրը հաջող իրականացնելուց հետո պլանավորվում է այն շարունակել երկրորդ փուլով, որում ընդգրկվելու են Տավուշի, Կոտայքի եւ Գեղարքունիքի մարզերը, հայտնում է ԱԻՆ լրատվական ծառայությունը:
