Հայաստան-ԵՄ համագործակցության խորհրդի նիստը հաստատում է, որ որոշակի ուղղություններում Հայաստանն ու Եվրամիությունը սերտացել են: Այդ մասին Բրյուսելում կայացած խորհրդի նիստի ամփոփիչ մամուլի ասուլիսում նշել է ԵՄ ընդլայնման եւ եվրոպական հարեւանության քաղաքականության հարցերով հանձնակատար Շտեֆան Ֆյուլեն:
«Արդեն կան որոշակի ձեռքբերումներ: Հենց նոր մենք վիզային ռեժիմի հեշտացման համաձայնագիր ենք ստորագրել եւ ԵՄ ծրագրերում Հայաստանի մասնակցության արձանագրություն: Հասարակ մարդկանց համար դա մեր սերտ գործընկերության տեսանելի եւ շոշափելի արդյունք է»,- ասել է Ֆյուլեն:
Նշելով կառավարման եւ մարդու իրավունքների ոլորտում Հայաստանի ջանքերը՝ Ֆյուլեն ընդգծել է, որ խնդիր են մնում դատական համակարգի ոչ բավարար անկախությունը եւ կոռուպցիայի դրսեւորումները:
«Նպատակները եւ սկզբունքները հստակ ձեւակերպված են: Այժմ խնդիրը դրանք իրագործելն է: Հայաստանն, իհարկե, կարող է ակնկալել ԵՄ-ի աջակցությունը: Մենք հուսով ենք, որ կարող ենք դրական գնահատական տալ մեր հարաբերությունների ամրապնդմանը Եվրոպական գործընկերության գագաթաժողովի ընթացքում, որը տեղի կունենա հաջորդ տարի Վիլնյուսում»,- նշել է ԵՄ-ի հանձնակատարը:
Նա ընդգծել է, որ հաջող արդյունքի հասնելու համար, որը թույլ կտա օգտագործել Հայաստանի եւ ԵՄ-ի միջեւ հարաբերությունների ողջ ներուժը, անհրաժեշտ են ջանքեր՝ հաջորդ տարի շարունակական բարեփոխումներ անցկացնելու համար:
