Հայաստանի պաշտպանության նախարարության ծառայողական բնակարանների հնարավոր սեփականաշնոհման հարցը քննարկվում է: Համապատասխան առաջարկ է ներկայացվել պաշտպանության նախարարին: Այդ մասին այսօր՝ դեկտեմբերի 24-ին կայացած մամուլի ասուլիսում նշել է ՊՆ կապիտալ շինարարության վարչության պետ Աշոտ Գրիգորյանը:
Ըստ նրա` հարցը շատ լուրջ է: Օրինակ, կան տներ, որոնք 90%-ով բնակեցված են թոշակի գնացած զինվորականների ընտանիքներով: «Այդ պատճառով էլ հարցի լուծման ժամանակ անհրաժեշտ է հաշվի առնել բազմաթիվ նրբություններ»:
Գերատեսչության ղեկավարը տեղեկացրել է, որ իր բաժնի իրավասության տակ գտնվող 5,5 հազար կառույցների 16%-ը կառուցվել են վերջին 20 տարիներին, նույն ընթացքում վերանորոգվել են 20%-ը, իսկ 64%-ի դեպքում էլ լրացել է պիտանիության ժամկետը, եւ դրանք վերանորոգման կարիք ունեն: 2012թ. որոշակի աշխատանք էր տարվել կապիտալ շինարարության ոլորտում` շահարկման էին հանձնվել մի քանի բնակելի տուն, յոթ զորամաս, երեք սեղանատուն, վերանորոգվել էին երեք տասնյակ գրասենյակներ եւ ավելի քան 60 զորամաս: 2013թ. նախատեսվում է իրականացնել հինգ բնակելի տների կապիտալ վերանորոգում, կառուցել եւս երեքը:
Հիվանդանոցներում պայմանների բարելավման առումով նույնպես նախատեսվել է որոշակի աշխատանք: Այսպես, կշարունակվի Կենտրոնական կլինիկական հիվանդանոցի գլխավոր շենքի վերանորոգումը, նախատեսված է նաեւ մասնաշենքերից մեկի նորոգումը: