European Stability Initiative (ESI) անկախ վերլուծական կենտրոնը ԵԽԽՎ անդամ եւ Վալենսիայի ինքնավար տարածաշրջանը ներկայացնող «Ժողովրդական կուսակցության» սենատոր, իսպանացի Պետրո Ագրամունտին պաշտոնաթող անելու հարցում է ուղարկել, El Pais իսպանական թերթում «Խավիարի դիվանագիտություն. Վալենսիայից մինչեւ Ադրբեջան» վերնագրով հոդվածում գրել է Խոսե Իգնասիո Տորեբլանկան: Հոդվածի թարգմանությունը հրապարակել է ԻնոՍՄԻ-ն:
Պարզաբանելով, թե ինչում են հստակ մեղադրում սենատոր Ագրամունտին, լրագրողը գրել է. «Որպեսզի ինքներդ լավ հասկանաք, ավելի լավ է կարդաք հետեւյալ երկու զեկույցը. «Խավիարի դիվանագիտություն, կամ ինչպես Ադրբեջանը ստիպեց Եվրոպայի Խորհրդին լռել», որը ներկայացվել է 2012 թվականին եւ «Կեղծիքի պատկերը. Ինչպես են դիտարկել Ադրբեջանը կամ ինչու պետք է Ագրամունտը թողնի իր պաշտոնը», որը ներկայացվել է 2013 թվականի հունվարի 22-ին: Եթե խոսենք գլխավորի մասին, ապա ESI-ն մատնանշում է այն, որ Ագրամունտը, լինելով Ադրբեջանում ժողովրդավարության եւ մարդու իրավունքների վերահսկման հարցերի գծով զեկուցող, որը պետք է եվրոպական հանրությանը հասցնի ադրբեջանական ընդդիմության ձայնը, դրա փոխարեն դարձել է Եվրոպայում Ալիեւի կլանի գլխավոր լոբբիստներից մեկը»:
Այնուհետեւ հեղինակը նշել է, որ միջազգային բոլոր կազմակերպությունները Ադրբեջանը համարում են անազատ երկիր: «Անկախություն հռչակելուց հետո այնտեղ ղեկավարել է Հեյդար Ալիեւը: Նրա մահվանից հետո այդ պաշտոնը ստանձնել է նրա որդին` Իլհամ Ալիեւը, որը 2003 թվականներին ընտրություններում հաղթել է «բացառապես առանց կասկածի»` 88.73% ձայն հավաքելով: Երբ նրա նախագահական երկրորդ ժամկետը մոտեցել էր ավարտին` 2009 թվականի մարտին Ալիեւ կրտսերը Սահմանադրության մեջ փոփոխություն մտցնելու համար հանրաքվե է անցկացրել, որի արդյունքում քվեարկողների 92%-ը հայտարարել են այն մասին, որ հաճույքով կվերանայեն Օրենսդրությունը, որպեսզի Իլհամ Ալիեւն իշխի այնքան, որքան կուզի»,-գրել է նա: