Արմավիրի մարզի Արազափ գյուղում 182 գյուղացիները «Ակբա կրեդիտ ագրիկոլ » բանկի գումարները չեն կարողացել վճարել եւ առաջիկայում նրանց գույքը աճուրդի է հանվելու:Այս մասին NEWS.am-ի թղթակցի հետ զրույցում ասաց Արազափ գյուղի գյուղապետ Մանվել Հարությունյանը:
Նրա խոսքով, այդ խնդիրը արդեն 4 տարվա պատմություն ունի: Գյուղացիները վարկը վերցրել են 3 տարով եւ աստիճանաբար մարել են: Սակայն վերջին տարում չեն կարողացել մնացած գումարի պարտքը մարել: «Այդ բանկը Արազափով ա դարձել բանկ: Միջինը 10 հազար դոլարով գումար էինք վերցնում, փակեցին, փակեցին, հետո վերջին 2 հազարը չկարողացան տալ: Բայց իրենք ոչ միայն այդ 2 հազար դոլորի տոկոսները հաշվեցին, այլեւ ամբողջ վերցված գումարի: Ավելին, այդ 182 գյուղացիների մեջ նաեւ երաշխավորներ կան, որոնք երաշխավոր են կանգնել, ինչի արդյունքում առաջիկայում կարող են զրկվել իրենց հողերից եւ տնից»,- նշեց գյուղապետը եւ ավելացրեց, որ ԴԱՀԿ-ից օրերս եկել են գյուղ: Առաջիկայում պետք է գյուղացիների տները եւ հողերը աճուրդի հանեն: