Վրաստանի նախագահը Սերժ Սարգսյանին շնորհավորել է երկրորդ ժամկետում վերընտրվելու կապակցությամբ:
«Գռուզիա օնլայնը» հայտնում է, որ Սահակաշվիլին Հայաստանի նախագահի հետ հեռախոսազրույցում նրան հաջողություն է մաղթել, իսկ հայ ժողովրդին՝ բարօրություն, տնտեսական եւ ժողովրդավարական զարգացում: Վրաստանի եւ Հայաստանի նախագահները նաեւ քննարկել են երկկողմ հարաբերությունները:
Հիշեցնենք, փետրվարի 18-ին Հայաստանում նախագահական ընտրություններ էին: Համաձայն ԿԸՀ նախնական տվյալների, 1988 ընտրատեղամասերի քվեաթերթիկների արդյունքների ամփոփումից հետո, Սերժ Սարգսյանը հավաքել է ձայների 58,6 տոկոսը:
«Ժառանգություն» կուսակցության առաջնորդ Րաֆֆի Հովհաննիսյանը՝ 36,75 տոկոսը: Ընտրություններին մասնակցել է 1 մլն 521 հազար 931 մարդ կամ ընտրողների 60,18%-ը:
Պետության ղեկավարին ավելի վաղ վերընտրվելու կապակցությամբ շնորհավորել էր Ռուսաստանի նախագահ Վլադիմիր Պուտինը: