Թբիլիսիում հայկական թատրոնը կվերականգնվի Վրաստանի վարչապետ Բիձինա Իվանիշվիլիի ֆոնդի հաշվին: Այս մասին, այսօր` փետրվարի 25-ին, լրագրողներին հայտարարել է Հայաստանում Վրաստանի Արտակարգ եւ լիազոր դեսպան Թենգիզ Շարմանաշվիլին:
«Մի կասկածեք, վերանորոգումը կկատարվի բարձր որակով»,- հավաստիացրել է դեսպանը` ավելացնելով, որ վարչապետն ինքն է ցանկություն հայտնել վերանորոգել թատրոնը:
Բացի թատրոնից` Իվանիշվիլիի ֆոնդը կֆինանսավորի վեց եկեղեցիների վերակառուցումը, որոնց պատկանելիությունը ճշտվում է, հայտարարել է դեսպանը: «Ավելի լավ է ես վերականգնեմ դրանք, իսկ հետո գիտնականները թող որոշեն`որ եկեղեցին ում է պատկանում, քանի որ, մինչ մենք տարիներով կվիճենք, դրանք լիովին կավերվեն, որից հետո որոշելու ոչինչ չի լինի»,- վարչապետի խոսքն է մեջբերել դեսպանը:
Նրա խոսքով` Մշակույթի նախարարությունն իր հերթին վերականգման աշխատանքներն իրականացելու կապակցությամբ որոշում է ընդունել, սակայն միջոցների հետ կապված դժավրությունների պատճառով` Իվանիշվիլին ինքն է գործն իր վրա վերցրել:
