Հանրային հեռուստառադիոընկերության խորհրդի անդամի թափուր պաշտոնում նշանակվել է «Շարմ հոլդինգ» ՍՊԸ տնօրեն, շոումեն Ռուբեն Ջաղինյանը: Մրցույթում հաղթող ճանաչված երկու թեկնածուներից հենց նա է նշանակվել թափուր պաշտոնում:
Նախագահի մամուլի գրասենյակի փոխանցմամբ, Ռուբեն Ջաղինյանը նշանակվել է Հանրային հեռուuտառադիոընկերության խորհրդի անդամ՝ վեց տարի ժամկետով
Անցկացվող մրցույթում հաղթող էին ճանաչվել դիմած երկու թեկնածուները` 44-ամյա Ռուբեն Վլադիմիրի Ջաղինյանը եւ 36-ամյա Աստղիկ Շամսի Ավետիսյանը:
Նշենք, որ խորհրդի անդամի պաշտոնն ազատ էր մնացել ՀՀՌԸԽ խորհրդի նախագահ Ալեքսան Հարությունյանի` պաշտոնավարման ժամկետն ավարտելուց հետո: NEWS.am-ի տեղեկություններով, խորհուրդն առաջիկայում նիստ կգումարի եւ խորհրդի նախագահ կընտրի Ռուբեն Ջաղինյանին:
Ռուբեն Վլադիմիրի Ջաղինյան
(Կենսագրական համառոտ տվյալներ)
Ծնվել է 1969 թվականի ապրիլի 28-ին, Երեւանում (Հայկական ԽՍՀ, ԽՍՀՄ): 1994թ. ավարտել է Երեւանի պոլիտեխնիկական ինստիտուտի էլեկտրատեխնիկական ֆակուլտետը:
1987-1989թթ. ծառայել է ԽՍՀՄ զինված ուժերում:
Աշխատանքային գործունեություն
1991 թվականից մինչ նշանակումը եղել է «Շարմ Հոլդինգ» ՍՊԸ-ի գլխավոր տնօրենը,
2005-2009թթ.- «Երեւան» ամսագրի նախագծի ղեկավար,
2005թ.-ից` Հեռուստատեսության եւ ռադիոյի միջազգային ակադեմիայի (IATR /ՌԴ/ ) ակադեմիկոս,
2006թ.-ից` Հայաստանի կինեմատոգրաֆիստների միության անդամ,
2006 - 2011թթ.- Երեւանի թատրոնի եւ կինոյի պետական ինստիտուտի «Արվեստի ոլորտի մենեջմենտ» կուրսի ղեկավար,
Աշխատանքային գործունեության ընթացքում հանդես է եկել որպես մի շարք նախագծերի եւ հեռուստատեսային ֆիլմաշարերի հեղինակ եւ պրոդյուսեր.
• USAID, UNICEF, UNESCO, «Save the children» եւ այլ կազմակերպությունների հետ համատեղ իրականացված սոցիալական նախագծերի,
• Ռուսաստանի Դաշնության մի շարք հեռուստաընկերությունների (ОРТ, РТР, СТС ) հետ համատեղ նախագծերի,
• միջազգային հեղինակավոր մրցանակների արժանացած երաժշտական նախագծերի /(«Երեւան- տրանզիտ» (2006-2009), «Հայկական ջազ- 70»` Ջազի տարվա շրջանակներում (2008)/,
• փաստավավերագրական ֆիլմերի /«Քանի դեռ կամ» (2000), «Հրաշագործի աշունը» (2008), «Մի լուսանկարի պատմություն» (2009), «Արվեստակիրներ» - 24 վավերագրական կինոնկարներից բաղկացած ֆիլմաշար հայ ազգային մշակույթում նշանակալի ներդրում ունեցող անհատների մասին (2009-2012) եւ այլն/
• լայնածավալ միջոցառումների / «Հատուկ նշանակության երգեր»` նվիրված Հայկական ազգային բանակի տարեդարձին (2007), «Էրեբունի-Երեւան»` Քաղաքի օրվա տոնակատարության կապակցությամբ (2007, 2009, 2010, 2012) եւ այլն/
• թատերական բեմադրությունների / բալետ «Սպարտակ» (2009)- բեմադրությունը` Յուրի Գրիգորովիչի (ՌԴ), օպերա «Աիդա» (2010) - բեմադրությունը` Մարիո Կոռադիի (Իտալիա) /
1991-1994թթ.` ՈւՀԱ (1992-ին եւ 1994-ին բարձրագույն լիգայի չեմպիոն` Երեւանի բժշկական ինստիտուտի թիմի կազմում):
Պարգեւներ
2007թ. - «Գարեգին Նժդեհ» մեդալ՝ ՀՀ պաշտպանության նախարարության կողմից` Ազգային բանակի կայացմանը եւ հզորացմանն ուղղված նշանակալի ավանդի համար:
2008թ.- Մովսես Խորենացու մեդալ` հայկական մշակույթի ասպարեզում ունեցած ստեղծագործական ձեռքբերումների համար:
2008թ. - ՀՀ մշակույթի նախարարության ոսկե մեդալ` հայկական ջազի 70-ամյակին նվիրված տոնակատարության (Armenian Jazz 70) կազմակերպման համար:
2009թ. – ՀՀ Նախագահի մրցանակ՝ արվեստի բնագավառում ներդրած ավանդի համար:
Ընտանիք
Ամուսնացած է, ունի երկու դուստր: