ԱՄՆ-ի սենատորներն ու կոնգրեսականները նամակով դիմել են Թուրքիայի վարչապետ Ռեջեփ Թայիփ Էրդողանին՝ կոչ անելով հրաժարվել իր այն հայտարարությունից, որտեղ սիոնիզմը մարդկության դեմ հանցագործություն էր անվանել:
Սենատորներ Մարկ Կիրկի եւ Բիլ Նելսոնի, կոնգրեսականներ Դագ Լամբրենի եւ Սթիվ Իսրայելի գրած նամակը ԱՄՆ-ի Կոնգրեսում եւ Սենատում 89 ստորագրություն է հավաքել:
Նամակում նշվում է, որ հարաբերությունների կարգավորումը Իսրայելի եւ Թուրքիայի շահերից է բխում, ինչպես նաեւ ամբողջ տարածաշրջանի անվտանգության շահերից:
Փետրվարի վերջին ՄԱԿ-ի Քաղաքակրթությունների դաշինք գիտաժողովում Էրդողանը հայտարարել էր, որ իսլամաֆոբիան մարդկության դեմ հանցագործություն է, ինչպես «սիոնիզմը, հակասեմականությունը, ֆաշիզմը»: ՄԱԿ-ի գլխավոր քարտուղարն այդ խոսքերն անվանել էր անզգույշ եւ ագրեսիվ, իսկ Իսրայելի վարչապետ Նեթանյահուն դատապարտել էր ստահոդ հայտարարությունը: Այցով Անկարայում գտնվող ԱՄՆ-պետքարտուղար Ջոն Քերրին եւս քննադատել էր Էրդողանի հայտարարությունը՝ այն «կասկածելի» որակելով: