Մայր աթոռ սուրբ Էջմիածինը հայտարարություն է տարածել հետընտրական զարգացումների առնչությամբ:
Հայտարարությունում ասվում է.
«Հետեւելով հետընտրական զարգացումներին եւ դրանց ընթացքում կատարված մեկնաբանություններին` հարկ ենք համարում նշել հետեւյալը:
Բարձր ենք գնահատում մեր ժողովրդի ողջամտությունը, որ դարձավ երաշխիքը ընտրությունների խաղաղ եւ քաղաքակիրթ կազմակերպման եւ իրականացման:
Նկատի առնելով ՀՀ Կենտրոնական ընտրական հանձնաժողովի, դիտորդական առաքելությունների զեկույցներն ու գնահատականները, ինչպես նաեւ այլ տեղեկատվական նյութերը` Մայր Աթոռ Ս. Էջմիածինը հստակ արտահայտել է իր կեցվածքն ընտրության արդյունքների վերաբերյալ եւ անընդունելի է նկատում, երբ փորձ է արվում այսօր քաղաքական շահարկումների թիրախ դարձնել Ս. Եկեղեցին, Հայոց Հայրապետին եւ անգամ ՀՀ նախագահի երդման արարողությանը գործածվող Վեհամոր Ավետարանը:
Մեծի պահոց այս շրջանում մեր ժողովրդի զավակներին հրավիրում ենք աղոթքի եւ կոչ ուղղում առաջնորդվել եղբայրասիրության ու համերաշխության ոգով` զերծ մնալով անհանդուրժողականության եւ ատելության դրսեւորումներից:
Հորդորում ենք նաեւ Տիար Րաֆֆի Հովհաննիսյանին` դադարեցնել հացադուլը եւ ընտրել քաղաքական պայքարի առավել կառուցողական միջոցներ: Եկեղեցին չի արդարացնում հացադուլը, քանզի այն աստվածատուր կյանքին սպառնացող գործողություն է»:
Հիշեցնենք, որ մարտի 10-ին Ազատության հրապարակում «Ժառանգության» առաջնորդ Րաֆֆի Հովհաննիսյանը հայտարարել էր հետեւյալը. «Եթե ապրիլի 9-ին Սերժ Սարգսյանը կեղծ երդում տա Աստվածաշնչի վրա եւ Վեհափառ հայրապետը պղծի Աստվածաշունչը, դա իրենք կանեն իմ դիակի վրա: Ես պետք է աղոթեմ նրանց համար: Ես հավանաբար այս տարի սուրբ Զատկի պատարագ չհասնեմ»: Այդ օրը Րաֆֆի Հովհաննիսյանը հացադուլ է հայտարարել, որը շարունակվում է մինչ օրս:
