Հանրապետությունում պահպանվում է սուր շնչառական վարակներով պայմանավորված հիվանդացության աճի տենդենցը: Այս մասին NEWS.am-ի թղթակցի հետ զրույցում ասաց ՀՀ առողջապահության նախարարության հիգիենիկ եւ հակահամաճարակային կենտրոնի գլխավոր մասնագետ Լիանա Թորոսյանը` հավելելով, որ այս շաբաթվա ամփոփումը կլինի առաջիկա երկու օրերին:
Նա շեշտեց, որ աճը մի կողմից պայմանավորված է պոլիկնիկաներ եւ հիվանդանոցներ բարձր դիմելիությամբ «Թեթեւ դեպքերը ավելի շատ են, քան բարդացված դեպքերը»,- նշեց նա: Երկուշաբթի օրվանից դպրոցներում սկսվում է գարնանային արձակուրդը, ինչը կնպաստի հիվանդացության նվազմանը:
Լիանա Թորոսյանը տեղեկացրեց, որ թեեւ բարձր է մարդկանց դիմելիությունը հիվանդանոցներ, բայց ամբողջ հանրապետություններում ստացիոնար բուժման մեջ է գտնվում 10-12 հիվանդ:
ՀՀ առողջապահության նախարարությունը կրկին հորդորում եւ հիշեցնում է.
• գրիպանման երեւույթների առկայության դեպքում մնալ տանը, չհաճախել աշխատանքի, դպրոց, մանկապարտեզ, բարձրագույն ուսումնական հաստատություններ
• չմասնակցել զանգվածային միջոցառումներին, որը կարող է պատճառ դառնալ հիվանդի վիճակի վատացման եւ նոր դեպքերի առաջացման ու տարածման
• չշփվել գրիպանման երեւույթներով անձանց հետ
• եթե շրջապատում առկա է գրիպով հիվանդ` պահպանել 2մ հեռավորություն
• չզբաղվել ինքնաբուժմամբ, անհարկի չօգտագործել հակաբիոտիկներ, կազմակերպել բժշկի այցը տուն
• պահպանել հազալու եւ փռշտալու վարվելակարգը
• խստորեն հետեւել անձնական հիգիենային
• հագնվել եղանակին համահունչ
• հաճախակի օդափոխել փակ տարածքները: