Վանաձորում 39-ամյա Տարոնուհի Ավետիսյանը մեղադրվում է կենցաղային հարցի շուրջ ծագած վիճաբանության ընթացքում հարազատ եղբորն սպանելու մեջ: Լոռիի մարզի ընդհանուր իրավասության դատարանից NEWS.am-ին փոխանցեցին, որ սույն գործը քննվելու է իրենց մոտ:
Գործի նյութերի համաձայն՝ 39-ամյա Տարոնուհի Ավետիսյանին մեղադրանք է առաջադրվել այն բանի համար, որ նա Վանաձոր քաղաքի իր տանը, եղբոր` Գարեգին Ավետիսյանի հետ կենցաղային հողի վրա ծագած վիճաբանության ժամանակ, վերջինիս առողջությանը վնաս պատճառելու դիտավորությամբ դանակով երկու անգամ հարվածել է նրա կրծքավանդակին եւ վերջինիս առողջությանը պատճառել ծանր վնաս՝ կյանքին վտանգ սպառնացող:
Բացի այդ, երկու ամիս անց Տարոնուհի Ավետիսյանն իր տանը, կրկին կենցաղային հողի վրա ծագած վիճաբանության ժամանակ, ապօրինաբար կյանքից զրկելու դիտավորությամբ, մի քանի անգամ դանակով հարվածներ է հասցրել եղբորը` Գարեգին Ավետիսյանին, որի հետեւանքով վերջինս տեղում մահացել է:
Քրեական գործ է հարուցվել քրեական օրենսգրքի 112-րդ հոդվածի 1-ին մասով (դիտավորությամբ մեկ ուրիշին մարմնական վնասվածք պատճառելը կամ առողջությանն այլ ծանր վնաս պատճառելը, որը վտանգավոր է կյանքի համար): Քրեական գործ է հարուցվել նաեւ 104 հոդվածի 1-ին մասով (սպանությունը` ապօրինաբար մեկ ուրիշին դիտավորությամբ կյանքից զրկելը), որը պատժվում է ազատազրկմամբ` 15 տարի ժամկետով:
Խափանման միջոց է ընտրվել կալանավորումը: Գործը դատարան է ստացվել ապրիլի 5-ին: Առաջիկայում կնշանակվի դատական քննության օրը:
