Հայաստանի Հանրապետության մշակույթի նախարարի պաշտոնակատար Հասմիկ Պողոսյանի հրավերով Իրանի մշակույթի եւ իսլամական առաջնորդման նախարար Սեյեդ Մոհամմադ Հոսեյնիի գլխավորած պատվիրակությունը պատասխան այցով 2013 թ. ապրիլի 18-20-ին կլինի Հայաստանում:
Հայաստանի մշակույթի նախարարության մամուլի ծառայությունից NEWS.am-ին հայտնում են, որ այցի ընթացքում նախատեսվում է «Հայաստանի Հանրապետության մշակույթի նախարարության եւ Իրանի Իսլամական Հանրապետության մշակույթի եւ իսլամական առաջնորդման նախարարության միջեւ 2013-2016 թթ. /1391-1394 թթ./ մշակույթի եւ արվեստի բնագավառներում համագործակցության մասին» գործնական ծրագրի ստորագրումը:
Այցի շրջանակում բարձաստիճան հյուրը կհանդիպի Ամենայն հայոց կաթողիկոս Գարեգին Բ-ի, ՀՀ փոխվարչապետ, ՀՀ տարածքային կառավարման նախարարի պաշտոնակատար` Արմեն Գեւորգյանի, ՀՀ մշակույթի նախարարի պաշտոնակատար Հասմիկ Պողոսյանի եւ Սփյուռքի նախարարի պաշտոնակատար Հրանուշ Հակոբյանի հետ:
Հայաստան այցի ծրագրով նախատեսվում են նաեւ այցելություններ Էջմիածին, Զվարթնոց, Գառնի, Գեղարդ վանական համալիր, Մեսրոպ Մաշտոցի անվան հին ձեռագրերի ինստիտուտ Մատենադարան, Երեւանի Կապույտ մզկիթ եւ այլն:
