Վարչապետի պաշտոնակատար Տիգրան Սարգսյանն ընդունել է Երեւանում անցկացված «Ռուսաստան եւ Հայաստան. բարեփոխումների դասերը» խորագրով Գայդարյան ընթերցումների կազմակերպիչներին, որն անցկացվել է Եգոր Գայդարի հիմնադրամի, Գայդարի անվան տնտեսական քաղաքականության ինստիտուտի եւ Հայ-ռուսական սլավոնական համալսարանի նախաձեռնությամբ:
Տիգրան Սարգսյանը ողջունել է նման քննարկումների անցկացումը, կապերի խորացումը եւ հայտնել կառավարության աջակցությունն այսպիսի նախաձեռնություններին:
Այնուհետեւ ներկայացվել է Գայդարյան ընթերցումների գիտագործնական ծրագրի ընթացքը, որում քննարկումներ են ծավալվել սոցիալ-տնտեսական հարցերի շուրջ: Նշվել է, որ 2010 թվականից ՌԴ-ում մեկնարկած ծրագիրն ԱՊՀ երկրներից առաջին անգամ անցկացվում է Հայաստանում:
Ծրագրի ներկայացուցիչները գոհունակություն են հայտնել Երեւանում անցկացված քննարկումների արդյունքներից, անդրադարձել տնտեսության եւ հումանիտար բնագավառներում ուսումնական եւ գիտական միջազգային փորձին ու միտումներին: